বিশ্বনাথ, 28 ছেপ্টেম্বৰঃ গান্ধী জয়ন্তীৰ লগত সংগতি ৰাখি ২ অক্টোবৰত বিশ্বনাথত "এখন প্লাষ্টিকমুক্ত ভাৰতৰ বাবে দৌৰ"ৰ আয়োজন কৰিছে বিশ্বনাথ জিলা প্ৰশাসনে ৷ এখন স্বচ্ছ আৰু নিকা ভাৰতবৰ্ষ নিৰ্মাণৰ বাবে থকা মহামানৱ মহাত্মা গান্ধীৰ সপোন আৰু এই আদৰ্শক বাস্তৱায়িত কৰণৰ ক্ষেত্ৰত প্ৰধানমন্ত্ৰী নৰেন্দ্ৰ মোদীৰ আন্তৰিক প্ৰয়াসৰ প্ৰতি সন্মান জনাই বিশ্বনাথ জিলা প্ৰশাসনে হাতত লৈছে এই পদক্ষেপ ৷ এখন প্লাষ্টিকমুক্ত বিশ্বনাথ গঢ়াৰ ক্ষেত্ৰত জন সচেতনতা বৃদ্ধিৰ বাবে জিলাখনৰ সমূহ সচেতন ব্যক্তিকে এই সমূহীয়া দৌৰত অংশগ্ৰহণ কৰিবৰ বাবে আহ্বান জনাই উপায়ুক্ত পৱিত্ৰ ৰাম খাউণ্ডে ৷ লগতে কয় যে,আৰক্ষী অধীক্ষককে প্ৰমুখ্য কৰি বহুসংখ্যক চৰকাৰী বিষয়া-কৰ্মচাৰী,আৰক্ষী,সেনাবাহিনীৰ লোক,পৌৰকৰ্মী,স্থানীয় শিক্ষানুষ্ঠানসমূহৰ এন এছ এছ গোট,শিক্ষক-শিক্ষয়িত্ৰী তথা ছাত্ৰ-ছাত্ৰী আদিয়ে অংশ ল'ব লগা এই দৌৰ বিশ্বনাথ চাৰিআলিৰ অসম ৰাজ্যিক পৰিবহণ নিগমৰ বাছ আস্থানৰ সমীপৰ পৰা আৰম্ভ হৈ চহৰৰ সোঁমাজেৰে ১৫নং ৰাষ্ট্ৰীয় ঘাইপথ হৈ বিশ্বনাথ চাৰিআলি সদৰ থানাৰ সমুখত অন্ত পৰিব ৷ দৌৰত অংশগ্ৰহণ কৰিব লগা সকলোৱে পথৰ দুয়োকাষে চকুত পৰা প্লাষ্টিকজাতীয় আৱৰ্জনাবোৰ বুটলি লৈ যাব আৰু নিৰ্দিষ্ট স্থানত অস্থায়ী ভাৱে স্থাপন কৰা ডাষ্টবিনত পেলাব ৷ এখন নিকা ভাৰতবৰ্ষ নিৰ্মাণৰ বাবে ৰাজ্যবাসীক প্লাষ্টিক বৰ্জনৰ আহ্বান জনায় বিশ্বনাথ জিলা প্ৰশাসনে ৷
লগতে পঢ়কঃ ইতিহাসত আজিৰ দিনটো
