বিশ্বনাথ,20 মাৰ্চ: ২৭ মাৰ্চত অনুষ্ঠিত হ'ব প্ৰথম পৰ্যায়ৰ বিধানসভা নিৰ্বাচন । ৰাজনৈতিক দলৰ প্ৰাৰ্থীসকল ব্যস্ত হৈ পৰিছে নিৰ্বাচনী প্ৰচাৰত । ভোটাৰসকলক আকৰ্ষণ কৰিবলৈ বিভিন্ন কৌশল অৱলম্বন কৰিছে ৰাজনৈতিক দলৰ প্ৰাৰ্থীসকলে ।
সমষ্টিটোৰ পৰা এইবাৰ কংগ্ৰেছ দলৰ হৈ প্ৰতিদ্বন্দ্বিতা কৰিছে প্ৰদেশ কংগ্ৰেছৰ সভাপতি ৰিপুণ বৰাই । কিন্তু দলৰ সভাপতি হোৱা বাবে ৰিপুণ বৰাই আন আন সমষ্টিত নিৰ্বাচনী প্ৰচাৰ চলোৱাত ব্যস্ত হ'বলগীয়া হৈছে । সেয়ে পিতৃক উদ্ধাৰৰ বাবে সমষ্টিত নামিছে কন্যা সংঘমিত্ৰা বৰা ।
যোৱা কেইবাদিনো ধৰি ৰিপুণ বৰাৰ কন্যা সংঘমিত্ৰাই গহপুৰৰ বাগিচাই বাগিচাই চাহ শ্ৰমিকসকলৰ লগত মত বিনিময় কৰি চাহ শ্ৰমিকক দৈনিক মজুৰি ৩৬৫ টকাৰ গেৰাণ্টিৰ কাৰ্ডক লৈ কংগ্ৰেছ পক্ষত ভোট দিবলৈ প্ৰচাৰ অভিযান অব্যাহত ৰাখিছে । কেৱল চাহ শ্ৰমিকসকলৰ মাজতে নাথাকি গাঁৱৰ পুৰুষ-মহিলা প্ৰতিজন লোকৰ ঘৰলৈ গৈছে সংঘমিত্ৰা ।
উল্লেখ্য যে সংঘমিত্ৰাৰ এই প্ৰচাৰ অভিযানে কংগ্ৰেছক পূৰ্বতকৈ বহু পৰিমাণে আগুৱাই নিব বুলিও চৰ্চা চলিছে গাঁৱসমূহত । একাংশৰ মতে কংগ্ৰেছ দলক উদ্ধাৰ কৰক বা নকৰক কিন্তু সংঘমিত্ৰাই যে সমাজৰ সকলোৰে অন্তৰ জয় কৰিবলৈ সক্ষম হৈছে সেইটো প্ৰায় নিশ্চিত ।
লগতে পঢ়ক: অবৈধ সুৰাৰ ঘাটিত আমগুৰি আৰক্ষীৰ অভিযান
