বিশ্বনাথ,5 ফেব্ৰুৱাৰী : বিশ্বনাথ জিলাৰ বিশ্বনাথ ঘাট ৰোডত শুকুৰবাৰে আনুষ্ঠানিকভাৱে উদ্বোধন কৰা হয় ৰাইজৰ দলৰ জিলা কাৰ্যালয় ৷ এই কাৰ্যালয়টো উদ্বোধন কৰে ৰাইজৰ দলৰ বিশ্বনাথ জিলাৰ সভাপতি সূৰ্য বৰাই ।
ইয়াৰ পাচতে শ্বহীদ তৰ্পন আৰু বন্তি প্ৰজ্বলন কৰে ৰাইজৰ দলৰ বিশ্বনাথ সমষ্টি সমিতিৰ সভাপতি গোবিন্দ নাথ আৰু কাৰ্যকৰী সভাপতি ভৱানন্দ শইকীয়াই । আনহাতে, কাৰ্যসূচীত অংশগ্ৰহণ কৰা ৰাইজৰ দলৰ নেতাসকলে সভাত উপস্থিত থকা ৰাইজক দেশ তথা ৰাজ্যৰ বিজেপি চৰকাৰৰ পৰা পৰিত্ৰাণ পোৱাৰ অৰ্থে ওলাই অহাৰ বাবে ধন্যবাদ আৰু কৃতজ্ঞতা জ্ঞাপন কৰে ৷
ৰাইজৰ দলৰ নেতা অখিল গগৈক যদিও কাৰাগাৰৰ ভিতৰত ভৰাই ৰাখিছে, তথাপি ৰাইজৰ দলৰ প্ৰতিজন সদস্যই এই দলটোক সুচাৰুৰূপে আগুৱাই নিবলৈ সক্ষম হৈছে । অনাগত সময়ত ৰাজ্যত ৰাইজৰ দলৰ নেতৃত্বতে চৰকাৰ গঠন হ’ব বুলি মন্তব্য কৰে দলটোৰ নেতাসকলে ৷
উল্লেখ্য যে, ৰাজ্যৰ অন্য প্ৰান্তৰ লগতে বিশ্বনাথতো ৰাইজৰ দলৰ জিলা সমিতি গঠন কৰি জিলাখনৰ সাংগঠনিক কাম-কাজ শক্তিশালী কৰিবলৈ সক্ষম হৈছে দলটোৱে । সভাত দুই শতাধিক লোক উপস্থিত থকাৰ লগতে বিশ্বনাথ সমষ্টিৰ বিভিন্ন প্ৰান্তৰ পৰা অহা বহু বিশিষ্ট ব্যক্তিয়ে ৰাইজৰ দলত আনুষ্ঠানিকভাৱে যোগদান কৰে ।
লগতে পঢ়ক : সৰুসজাইত ২৯,৭০১ গৰাকী শিক্ষকক নিযুক্তি পত্ৰ বিতৰণ
