বিশ্বনাথ, ১১ আগষ্টঃ তিনিটাকৈ বানত অভাৱনীয় ভাবে ক্ষতিৰ সন্মুখীন হোৱাৰ পাছত এইবাৰ বিশ্বনাথ জিলাৰ গহপুৰৰ পথাৰত চৰহা পোকৰ উপদ্ৰৱত হাহাকাৰ পৰিস্থিতিৰ সৃষ্টি হৈছে কৃষক সকলৰ মাজত । গহপুৰ মহকুমাৰ জাৰনীগাঁও, ককিলাগুৰি, ডুবিয়া অঞ্চলকে ধৰি হাজাৰ-হাজাৰ হেক্টৰ ধান খেতিত চানি ধৰিছে চৰহা পোকে । ইতিমধ্যে চৰহা পোকৰ আক্ৰমনৰ ফলত নষ্ট হৈছে বিঘাই -বিঘাই সজাল ধৰা ধান খেতি ৷
ইফালে চৰহা পোকৰ উপদ্ৰৱৰ পৰা ৰক্ষা পাবলৈ কৃষক সকলে বহু কীটনাশক দ্ৰব্য চতিয়াইছে যদিও এতিয়ালৈকে কোনো সুফল নোপোৱাত পানীত হাঁহ নচৰা অৱস্থাৰ সৃষ্টি হৈছে কৃষক সকলৰ । ইফালে কৃষি বিভাগৰ ফালৰ পৰা কোনো ধৰণৰ সহায় সহযোগ নোপোৱাত দিক বিদিক হেৰুৱাইছে কৃষক ৰাইজে ।
আনহাতে কৃষিৰ ওপৰতে নিৰ্ভৰশীল ৰাইজে এনেদৰে কষ্টেৰে কৰা খেতি ডৰাও পোকে নষ্ট কৰাত পৰিয়াল পোহপাল দিয়াক লৈ ভীষন চিন্তাত পৰিছে কৃষক ৰাইজ । অতি শীঘ্ৰে চৰকাৰ তথা বিভাগীয় কৰ্তৃপক্ষই চৰহা পোকৰ উপদ্ৰৱৰ পৰা ৰক্ষাৰ বাবে উপযুক্ত ব্যৱস্থা গ্ৰহণ কৰিবলৈ আহ্বান জনাইছে কৃষক সকলে ৷
ঠিক একেদৰে লখিমপুৰৰ নাওবৈচাতো চৰহা পোকে নষ্ট কৰিছে হাজাৰ-হাজাৰ বিঘা সজাল ধৰা ধান খেতি ৷ বহু কীট নাশক দ্ৰব্য চতিয়াইও কোনো সুফল নোপোৱাত হাহাকাৰ পৰিস্থিতিৰ সৃষ্টি হৈছে ৷ ইফালে চৰকাৰ তথা কৃষি বিভাগক নষ্ট হোৱা ধান খেতিৰ বাবে উপযুক্ত সহায়ৰ বাবে আহ্বান জনাইছে কৃষক সকলে ৷ নহ'লে পৰিয়াল পোহ-পাল দিবলৈয়ো উপায় বিহীন হৈ পৰিব বুলি চৰকাৰক কাতৰ আহ্বান জনাইছে কৃষক সকলে ৷
লগতে পঢ়ক- নগাঁৱত বিধায়ক শিলাদিত্যৰ প্ৰৱেশ নিষিদ্ধ কৰিলে এ জে ৱাই ছি পিয়ে
