বিশ্বনাথ,৩ মে'ঃ বিশ্বনাথ চাৰিআলিৰ দ’গাঁৱত থকা ইণ্ডিয়ান অইলৰ পেট্ৰ’ল পাম্পৰ চাৰি কৰ্মচাৰীয়ে যুৱতী ধৰ্ষণৰ অপচেষ্টা চলোৱাক কেন্দ্ৰ কৰি সমগ্ৰ চহৰখনত বিৰাজ কৰিছে তীব্ৰ উত্তেজনা ৷ শনিবাৰে নিশা প্ৰায় ৮.৩০ বজাত সংঘটিত হয় উক্ত ঘটনা ৷ চহৰখনৰ জে কে চিকিৎসালয়ত কৰ্মৰত দুগৰাকী নাৰ্ছক খোজকাঢ়ি চিকিৎসালয়লৈ অহা অৱস্থাত চাৰিজনীয়া দুৰ্বত্তৰ এটা দলে আগচি ধৰ্ষণৰ চেষ্টা চলায় ৷ ঘটনাস্থলীৰ পৰা শনিবাৰে নিশা এজন দুৰ্বৃত্তক স্থানীয় ৰাইজে কৰায়ত্ত কৰাৰ পিছত দেওবাৰে পুৱা আৰক্ষীয়ে গ্ৰেপ্তাৰ কৰিবলৈ সক্ষম হয় অন্য তিনিজন অভিযুক্তক ৷
উল্লেখ্য যে, চিকিৎসালয়খনৰ পৰা প্ৰায় ১০০ মিটাৰ দূৰত্বত পেট্ৰ’ল পাম্পটো অৱস্থিত ৷ ঘটনাটোৰ ফলত অচেতন হোৱা এগৰাকী নাৰ্ছক সম্প্ৰতি চিকিৎসা প্ৰদান কৰা হৈছে ৷ পেট্ৰ’ল পাম্পটোৰ সন্মুখত চিকিৎসালয়খনৰ একাংশ নাৰ্ছ ভাড়াতীয়া হিচাবে থাকে আৰু এইসকল নাৰ্ছক পূৰ্বে প্ৰায়ে অভিযুক্ত যুৱক কেইজনে অশালীন মন্তব্য কৰিছিল ৷ ইফালে ভুক্তভোগী এগৰাকী যুৱতীয়ে দিয়া লিখিত অভিযোগৰ ভিত্তিত আৰক্ষীয়ে 119/2020, U/S 341/342/354/354-A/34 ভাৰতীয় দণ্ডবিধিৰ অধীনত এক গোচৰ ৰুজু কৰি যুৱককেইজনক গ্ৰেপ্তাৰ কৰে ৷ ধৃত ব্যক্তিকেইজন ক্ৰমে ধৰ্মেন্দৰ শৰ্মা, ৰাহুল পেটেল, অশোক শ্বাহ আৰু গৌৰৱ পেটেল বুলি জানিব পৰা গৈছে ৷ আৰক্ষীয়ে বৰ্তমানো ঘটনাৰ তদন্ত অব্যাহত ৰাখিছে ৷
লগতে চাওকঃ বিশ্বনাথত উত্তেজনাঃ চিকিৎসালয়লৈ যোৱাৰ অৱস্থাত ধৰ্ষণৰ চেষ্টা দুগৰাকী নাৰ্চক !
