বিশ্বনাথ ১২ জানুৱাৰী : বনভূমি অধিকাৰ আইন, ২০০৬ৰ(The Forest Rights Act, 2006) অধীনত ভূমিৰ অধিকাৰ প্ৰদান সম্পৰ্কে বৃহস্পতিবাৰে বিশ্বনাথত এক পৰ্যালোচনা সভা অনুষ্ঠিত হয় । বিটিআৰ প্ৰধান প্ৰমোদ বড়োৰ অধ্যক্ষতাত বিশ্বনাথ প্ৰশাসনৰ সন্মিলন কক্ষত অনুষ্ঠিত হয় এই পৰ্যালোচনা সভা(BTR chief Pramod Boro at Biswanath) ৷ বিশ্বনাথত বনভূমিৰ অধিকাৰ বিচাৰি আবেদন কৰা লোকসকলক বনভূমি অধিকাৰ আইন, ২০০৬ৰ অধীনত আৰু চৰকাৰী নীতি নিয়ম অনুসৰি কিছু সৰলীকৰণ প্ৰক্ৰিয়াৰ মাজেৰে ভূমিৰ অধিকাৰ প্ৰদানৰ যাৱতীয় খৰতকীয়া ব্যৱস্থা গ্ৰহণ কৰিবলৈ বন বিভাগ আৰু সংশ্লিষ্ট সকলো পক্ষক সভাই আহ্বান জনায় ।
উল্লেখ্য যে, বনভূমিত বসবাস কৰা লোকৰ ভূমিৰ অধিকাৰ সম্পৰ্কে পৰ্যবেক্ষণৰ বাবে বিশ্বনাথ আৰু গহপুৰ মহকুমাত থকা মহকুমা পৰ্যায়ৰ এছডিএলচিৰ (SDLC) অধীনত ৬২ খন বনভূমি অধিকাৰ সমিতি আৰু জিলা পৰ্যায়ত থকা ডিএলচি (DLC)ৰ অধীনত ৫৪ খন বনভূমি অধিকাৰ সমিতি আছে । গহপুৰ আৰু বিশ্বনাথত মহকুমা পৰ্যায়ৰ সমিতিয়ে আজিৰ তাৰিখত ভূমিৰ অধিকাৰ বিচাৰি কৰা মুঠ ৩৯৮৯ খন আবেদন লাভ কৰিছে । ইয়াৰে ৩৭২২ খন আবেদন ব্যক্তি বিশেষৰ আৰু ২৬৭ খন আবেদন অনুষ্ঠান বিশেষৰ ।
একেদৰে জিলা পৰ্যায়ৰ সমিতি ডিএলচিয়েও আজিৰ তাৰিখত ভূমিৰ অধিকাৰ বিচাৰি কৰা মুঠ ৩৪৫০ খন আবেদন লাভ কৰিছে । ইয়াৰে ৩০৬৬ খন আবেদন ব্যক্তি বিশেষৰ আৰু ৩৮৪ খন আবেদন অনুষ্ঠান বিশেষৰ । অন্যহাতে বিশ্বনাথত নতুনকৈ বনভূমি অধিকাৰ সমিতি গঠনৰ বাবে ২৪ টা নতুন প্ৰস্তাৱো আছে, য'ত বনভূমিৰ অধিকাৰ বিচাৰি ১৮০৫ খন আবেদন আছে । বনভূমি অধিকাৰ আইন, ২০০৬ৰ অধীনত এই আবেদন আৰু দাবীসমূহ পৰীক্ষাৰ অন্তত আবেদনকাৰীক ভূমিৰ অধিকাৰ অৰ্থাৎ টাইটল চাৰ্টিফিকেট্ (Title Certificate) প্ৰদান কৰা হয় ।
