চতিয়া, 25আগষ্টঃ জামুগুৰিহাটৰ ধলাইবিল চামধৰা গাঁৱৰ ষষ্ঠ শ্ৰেণীত অধ্যয়নৰত ৰাহুল বৰা নামৰ এগৰাকী কিশোৰৰ অসাধাৰণ প্ৰতিভাই সকলোৰে দৃষ্টি আকৰ্ষণ কৰিবলৈ সক্ষম হৈছে ৷ মহামাৰী কৰ'ণাৰ বাবে বিদ্যালয় বন্ধ থকাৰ সময়খিনিত অধ্যয়নৰ সমান্তৰালকৈ ষষ্ঠ শ্ৰেণীত অধ্যয়নৰত ৰাহুল বৰাৰ হাতৰ পৰশত প্ৰাণ পাই উঠিছে মূলত পেলনীয়া ডাঠ কাগজৰ কাৰ্টুনৰ টুকুৰাই ৷ ডাঠ কাগজৰ টুকুৰা কাটি কিশোৰগৰাকীয়ে তৈয়াৰ কৰিছে গোঁসাই ঘৰৰ খটলা তথা গুৰু আসন, ট্ৰেক্টৰ, জেচিবি, ফকলেণ্ড, ৰেল, অত্যাধুনিক বন্দুক, ফুলদানী, বাঁহৰ বাহী, চকী ইত্যাদি ৷
দিন হাজিৰা কৰি পৰিয়াল পোহপাল দি অহা কুমুদ বৰা আৰু প্ৰণতি বৰাৰ পুত্ৰ 11 বছৰীয়া ৰাহুল বৰাৰ এই অসাধাৰণ প্ৰতিভাই সকলোকে মুগ্ধ কৰি তুলিছে ৷ কণমাণি ৰাহুলৰ ভৱিষ্যত দিনত মেকানিকেল অভিযন্তা হোৱাৰ মন ৷ দৰিদ্ৰ পৰিয়ালৰ ৰাহুলে মনে বিচৰা ধৰণে যদি সা-সুবিধা লাভ কৰে তেন্তে ৰাহুলৰ হাতৰ পৰশত ন-ন শিল্পকলাই প্ৰাণ পাই উঠাৰ সম্ভাৱনাই দেখা দিছে ৷
লগতে পঢ়কঃ মুখ্যমন্ত্ৰীৰ গৃহ জিলাত পথ নিৰ্মাণত দুৰ্নীতিৰ অভিযোগ
