বিশ্বনাথ,24 এপ্ৰিল: বাঢ়ি অহা ক’ভিড আক্ৰান্তৰ সংখ্যাৰ প্ৰতি গুৰুত্ব দি বিশ্বনাথৰ জিলা প্ৰশাসনে জিলাখনত ক’ভিডৰ পৰীক্ষা কাৰ্য আগবঢ়াই নিছে । সমান্তৰালকৈ বিশ্বনাথ পৌৰসভা আৰু খণ্ড উন্নয়ন কাৰ্যালয়ৰ দ্বাৰা ৰাজহুৱা স্থানসমুহ নিয়মিতভাৱে চেনিটাইজেশ্যন কৰি থকা হৈছে । বৃহস্পতিবাৰলৈকে জিলাখনত সৰ্বমুঠ ৩,১৫০ টা পৰীক্ষা সম্পন্ন কৰা হৈছে ৷ তদুপৰি দৈনিক ২০০০ টা পৰীক্ষা সম্পন্ন কৰাৰ লক্ষ্য বান্ধি লৈছে বিশ্বনাথ প্ৰশাসনে । এই পৰীক্ষাসমূহৰ ভিতৰত মাত্ৰ ১৪ গৰাকী লোকৰ শৰীৰত কৰ’ণাৰ অৱস্থিতি পোৱা গৈছে ।
জিলা উপায়ুক্ত প্ৰণৱ কুমাৰ শৰ্মাই ক্ষীপ্ৰতাৰে কৰ’ণাৰ পৰীক্ষা আৰু ক’ভিড প্ৰট’কল মানি চলিলেহে এই ভাইৰাছৰ সংক্ৰমণ ৰোধ কৰা সম্ভৱ বুলি মন্তব্য আগবঢ়ায় ৷ ইতিমধ্যে জিলাখনত সকলো প্ৰকাৰৰ সতৰ্কতামূলক ব্যৱস্থা গ্ৰহণ কৰা হৈছে ৷ তদুপৰি সকলোকে ক’ভিড প্ৰট’কল মানি চলিবলৈ আহ্বান জনায় উপায়ুক্তগৰাকীয়ে ৷
জিলা উপায়ুক্ত গৰাকীয়ে খণ্ড উন্নয়ন বিষয়া আৰু গাওঁবুঢ়াসকলক বহিঃৰাজ্যৰ পৰা অহা লোকসকলৰ ওপৰত চোকা দৃষ্টি ৰখাৰ লগতে তেওঁলোকৰ বিষয়ে জিলা প্ৰশাসন আৰু স্বাস্থ্য বিভাগক তৎক্ষণাত অৱগত কৰিবলৈ নিৰ্দেশ জাৰি কৰিছে ।
বিশ্বনাথৰ অতিৰিক্ত জিলা উপায়ুক্ত লিজা তালুকদাৰে কয় যে, "আমাৰ মূল উদ্দেশ্য হৈছে ভাইৰাছ বিয়পোৱাত বাধা দিয়া । আমি দৈনিক ১২ টাতকৈও অধিক স্থানত ৰেপিড এণ্টিজেন টেষ্ট সম্পন্ন কৰি আহিছো । লগতে প্ৰতিষেধক প্ৰদান কাৰ্য অব্যাহত ৰাখিছো"৷
ইফালে নিজ ঘৰতে আছুতীয়াকৈ থকা ক’ভিড ৰোগীয়ে যাতে সম্পূৰ্ণৰূপে ক’ভিডৰ নিয়মসমূহ মানি চলে তাৰ নিৰীক্ষণৰ বাবে চক্ৰ বিষয়াসকলৰ অধীনত আশাকৰ্মীসকলৰ দ্বাৰা টাস্ক ফ’ৰ্চ গঠন কৰা হৈছে ।
লগতে পঢ়ক: ক'ভিডৰ ভয়াৱহ সংক্ৰমণ: তৎপৰ মন্ত্রী হিমন্ত বিশ্ব শৰ্মা
