বিশ্বনাথ,18 মে': বিশ্বনাথ জিলাৰ বিহালী সমষ্টিৰ মাজগাঁৱৰ এগৰাকী অধ্যয়ন পিপাষু ব্যক্তি যাৰ নাম টীকাৰাম উপাধ্যায় ৷ তিনিকুৰি ঊৰ্ধৰ টিকাৰাম উপাধ্যায় বহুলোকৰ বাবে প্ৰেৰণাৰ উৎস হৈ পৰিছে ৷ কিয়নো যি বয়সত মানুহে এলাহ, অৱসাদ অনুভৱ কৰে, তেনে বয়সত তেওঁ দেখুৱাইছে সফলতা অৰ্জনৰ পথ ৷
টীকাৰাম উপাধ্যায়ে ১৯৭৬ চনতে মেট্ৰিক পাছ কৰিছিল ৷ কিন্তু আৰ্থিক অৱস্থা টনকিয়াল নোহোৱাত উচ্চ শিক্ষা ল’ব পৰা নাছিল ৷ দহ বছৰৰ অন্তত উচ্চ মাধ্যমিক পৰীক্ষা পাছ কৰি ২০১৫ বৰ্ষত স্নাতক ডিগ্ৰী লাভ কৰে উপাধ্যায়ে ৷ ইয়াৰ পাচত শিক্ষাৰ প্ৰতি থকা ধাউতিৰ বাবে সম্প্ৰতি ৬১ বছৰ বয়সত তেজপুৰ আইন মহাবিদ্যালয়ৰ পৰা আইনৰ স্নাতক ডিগ্ৰী লাভ কৰে ৷ এইগৰাকী ব্যক্তিয়ে শিক্ষা যে এক জীৱনজোৰা পদ্ধতি এই কথাৰ নিদৰ্শন দাঙি ধৰিছে ৷
একাগ্ৰতা থাকিলে বয়সৰো কোনো কথা নাথাকে ৷ মাথো সাধনা আৰু আগ্ৰহ থাকিব লাগিব ৷ বৰ্তমান টীকাৰামে আইনৰ স্নাতকোত্তৰ শ্ৰেণীত নামভৰ্তি কৰিব বুলি জানিবলৈ দিয়ে ৷
লগতে পঢ়ক: সোৱণশিৰিত নদীয়ে খেদিছে নৈপৰীয়াক
