কৰ্তব্যৰত বিষয়াক ভাবুকি দি মোকলোৱাৰ চেষ্টা চোৰাং কাঠ ভৰ্তি ট্ৰাক

বৃহস্পতিবাৰে বৰপেটাৰ হাউলীত জিলা পৰিবহন বিভাগৰ এনফ'ৰ্চমেণ্ট বিষয়াৰ নেতৃত্বত নিয়মীয়া চালাচীৰ সময়তে জব্দ কৰা হৈছিল এখন অবৈধ কাঠ ভৰ্তি ট্ৰাক ৷ কিন্তু ট্ৰাকখন আগে আগে এখন ব্যক্তিগত বাহনত আহি থকা যুৱকৰ এটা দলে কৰ্তব্যৰত বিষয়াক ভাবুকি প্ৰদানৰ অভিযোগ উত্থাপন হৈছে ৷

বৰপেটা, 17 ছেপ্তেম্বৰ : ৰাজ্যৰ বন মন্ত্ৰীয়ে বন বিভাগটোক নিকা আৰু দুৰ্নীতিমুক্ত কৰাৰ চেষ্টা অব্যাহত ৰাখিছে যদিও ৰাজ্যত প্ৰতিদিনে অব্যাহত আছে চোৰাং কাঠৰ অবাধ সৰৱৰাহ ৷ একেদৰে মেঘালয়ৰ পৰা বৰপেটালৈ নিৰ্বিবাদে প্ৰতি নিশাই সৰবৰাহ হৈ আছে কাঠ ভৰ্তি ট্ৰাক ৷ চোৰাং কাঠ ব্যৱসায়ীয়ে নিজে সুৰক্ষা দি পাৰ কৰাই আহিছে চোৰাং কাঠৰ ট্ৰাকসমূহ ৷

আনকি কৰ্তব্যৰত চৰকাৰী বিষয়া কৰ্মচাৰীক ভাবুকি পৰ্যন্ত দি বলপুৰ্বকভাৱে কাঠৰ গাড়ী পাৰ কৰিবলৈ চেষ্টা চলোৱাৰ দৰে ঘটনাও সংঘটিত হৈছে বৰপেটাত । বৰপেটা জিলা পৰিবহন বিভাগৰ এনফ'ৰ্চমেণ্ট বিষয়াৰ নেতৃত্বত বৰপেটা-হাউলী পথত নিশাৰ নিয়মীয়া তালাচীৰ সময়ত জব্দ কৰা হয় এ এচ ২৫ এ চি ১২৬৪ নম্বৰৰ কাঠভৰ্তি ট্ৰাকখন ৷

পিচে কাঠ ভৰ্তি ট্ৰাকখন জব্দ কৰাৰ পিচতে ট্ৰাকখনৰ আগে আগে নিৰাপত্তা দি এখন বলেৰ'ত অহা যুৱকৰ এটা দলে পৰিবহন বিষয়াৰ দলটোক আগচি ধৰি বলপূৰ্বকভাৱে ট্ৰাকখন মোকলাই নিয়াৰ চেষ্টা চলায় ৷

দাবী ধমকিৰে কাঠৰ ট্ৰাকখন মোকলাই নিব নোৱাৰি পৰিবহন বিষয়াৰ দলটোক উৎকোচ আদায় দিয়াৰো চেষ্টা চলায় দলটোৱে ৷ এই সময়চোৱাত পৰিবহন বিষয়াৰ সৈতে বলেৰ'ত অহা লোকসকলৰ তীব্ৰ বাক বিতণ্ডা হয় যদিও পৰিবহন বিভাগে ট্ৰাকখন জব্দ কৰি বনবিভাগক চমজাই দিয়ে ৷

ৰাজ্য প্ৰশাসনত ব্যাপক সংস্কাৰ চলি থকাৰ সময়তে এনেদৰে কাঠ ব্যৱসায়ীয়ে কৰ্তব্যৰত বিষয়াক দাবী ধমকিৰে জব্দ কৰা কাঠৰ গাড়ী মোকলাই নিয়াৰ চেষ্টাৰ ঘটনাক লৈ বৰপেটাত চাঞ্চল্যৰ সৃষ্টি হৈছে ৷ ইপিনে কাঠখিনি কলগাছিয়াৰ জমছেৰ আলীৰ বুলি জানিব পৰা গৈছে ৷

লগতে পঢ়ক : পৃথক বড়োলেণ্ডৰ দাবীৰে নতুন উগ্ৰপন্থী সংগঠন ULBৰ আত্মপ্ৰকাশ