জনীয়া, ২৯ জুন: কলগাছিয়াৰ দেউকুৰাত শনিবাৰে ৰাইজে এখন ট্ৰেক্টৰ আটক কৰি আৰক্ষীক গতাই দিয়ে । বৰপেটা আৰু বঙাইগাঁও জিলাৰ সীমান্তৱৰ্তী এলেকা গুনিয়ালগুৰি আৰু কোকিলা সংযোগী মৰা মানাহৰ ওপৰত নিৰ্মীয়মান পকী দলং খনৰ ৰড সমূহ অবৈধ ভাৱে লৈ যোৱাৰ সন্দেহত ৰাইজে নম্বৰ বিহীন ট্ৰেক্টৰখন আটক কৰে ।
দলং নিৰ্মাণৰ বাবে অনা ৰড সমূহ চোৰাং বজাৰত বিক্ৰী কৰাৰ সন্দেহ প্ৰকাশ কৰি ৰাইজে ট্ৰেক্টৰখন কলগাছিয়া আৰক্ষীক গতাই দিয়ে । উত্তৰ অভয়াপুৰী সমষ্টিৰ বিধায়ক আব্দুল হাই নাগৰিয়ে আধাৰশিলা স্থাপন কৰা এই দলং খনৰ ঠিকা লাভ কৰিছিল বিধায়ক গৰাকীৰ নিজ পুত্ৰ আৰু জনৈক খন্দকাৰ নামৰ এজন লোকে । অভিযোগ অনুসৰি শামুকীয়া গতিৰে কাম চলি থকা বাবে এই দলংখনৰ নিৰ্মাণৰ কাম আধৰুৱা হৈ আছে । ইপিনে কিছুদিন ধৰি নিৰ্মাণৰ কাম বন্ধ হৈ পৰাত ৰাইজে যাতায়তৰ ক্ষেত্ৰত চৰম হাৰাশাস্তিৰ সন্মুখীন হৈছে । দলঙৰ ৰড সমূহ এনেদৰে আন ঠাইলৈ লৈ যোৱাত ৰড সমূহ চোৰাং বজাৰত বিক্ৰী কৰাৰ সন্দেহ প্ৰকাশ কৰে স্থানীয় ৰাইজে । কলগাছিয়া আৰক্ষীয়ে ইতিমধ্যে এই সন্দৰ্ভত তদন্ত আৰম্ভ কৰিছে ।
