বৰপেটা,8 অক্টোবৰঃ শাৰদীয় দুৰ্গোৎসৱৰ দশমীৰ আনন্দৰ মাজতে মংগলবাৰে হাউলীত এক শোকাৱহ পথ দুৰ্ঘটনা সংঘটিত হয় ৷ হাউলীৰ 31 নং ৰাষ্ট্ৰীয় ঘাইপথৰ কালঝাৰত সংঘটিত হোৱা ভয়াৱহ পথ দুৰ্ঘটনাত থিতাতে নিহত হয় এজন লোক ৷ নিহত লোকজনক হাউলীৰ ১ নং ৱাৰ্ডৰ বাসিন্দা প্ৰশান্ত দাস ওৰফে ভাইটি বুলি চিনাক্ত কৰা হৈছে । ঘটনা অনুসৰি বিয়লি প্ৰশান্ত দাসে তেওঁৰ ব্যক্তিগত AS 01 U 2082 নম্বৰৰ মাৰুতি অল্টো কাৰখনেৰে ৩১ নং ৰাষ্ট্ৰীয় ঘাইপথেৰে হাউলীৰ পৰা সৰুপেটা অভিমুখে গৈ থকা অৱস্থাত তীব্ৰবেগী এখন বাছে পিছফালৰ পৰা তীব্ৰ বেগত খুন্দা মাৰে । বাছখনৰ খুন্দাত মাৰুতি কাৰখনে নিয়ন্ত্ৰণ হেৰুৱাই পথৰ বহু দূৰলৈ ছিটিকি যায় । ফলত চালকৰ আসনত থকা প্ৰশান্ত দাস ওৰফে ভাইটিৰ থিতাতে নিহত হয় । দুৰ্ঘটনাটোত গাড়ীখনত থকা প্ৰশান্ত দাসৰ পুত্ৰ ধীমান দাস আৰু দীপাশ্ৰী তালুকদাৰ নামৰ সৰুপেটাৰ এগৰাকী যুৱতী আহত হয় ৷ আহত দুয়ো জনকে স্থানীয় লোকে হাউলীৰ সমূহীয়া চিকিৎসালয়ত ভৰ্তি কৰায় যদিও গুৰুতৰভাৱে আঘাতপ্ৰাপ্ত ধীমান দাসক উন্নত চিকিৎসাৰ বাবে বৰপেটা মেডিকেল কলেজ হাস্পতাললৈ প্ৰেৰণ কৰা হয় ।
মৃত প্ৰশান্ত দাসৰ ঘৰলৈ অহা আত্মীয় যুৱতীগৰাকীক সৰুপেটাত থ'বলৈ যোৱাৰ সময়তে দুৰ্ঘটনাটো সংঘটিত হোৱাৰ লগতে লোকজন মৃত্যুমুখত পৰিবলগীয়া হোৱাৰ ঘটনাই হাউলী চহৰত শোকৰ ছাঁ পেলাইছে ৷ ইপিনে দুৰ্ঘটনা সংঘটিত কৰি বাছখন পলাই যাবলৈ সক্ষম হয় বুলি আৰক্ষীয়ে উল্লেখ কৰিছে ৷
আৰু পঢ়ক
