গুজৰাটৰ পৰা অহা 144 যাত্ৰীক বৰপেটাত কোৱাৰেণ্টাইন

বৰপেটাৰোড ৰেল ষ্টেচনত গুজৰাটৰ আহমেদাবাদৰ পৰা বিশেষ শ্ৰমিক ৰেল যোগে আহি উপস্থিত হোৱা শ্ৰমিক সকলক কটকটীয়া নিৰাপত্তা ব্যৱস্থাৰ মাজেৰে স্বাস্থ্য পৰীক্ষা কৰি কোৱাৰেন্টাইন কেন্দ্ৰলৈ প্ৰেৰণ ৷

বৰপেটাৰোড,28মেঃ গুজৰাটৰ আহমেদাবাদৰ পৰা বিশেষ শ্ৰমিক ৰেল যোগে বৃহস্পতিবাৰে পুৱা পাঁচ বজাত আহি বৰপেটাৰোড ৰেলৱে' ষ্টেচনত উপস্থিত হয় 144 জন বহিঃৰাজ্যত আবদ্ধ লোক ৷ ইপিনে ষ্টেচনত পূৰ্বৰ পৰাই ৰৈ থকা চিকিৎসকৰ দল এটিয়ে যাত্ৰীসকলৰ স্বাস্থ্য পৰীক্ষা কৰে ৷ যাত্ৰীসকলক পৰীক্ষাৰ অন্তত বৰপেটাৰোডৰ ৰেলৱে' ষ্টেচনত নমা 144 যাত্ৰীকেই জিলা প্ৰশাসনে কোৱাৰেণ্টাইন কৰাৰ ব্যৱস্থা কৰে ৷ বৰপেটা জিলা প্ৰশাসনে উক্ত যাত্ৰীসকলৰ ছয় খন বাছ গাড়ীৰে বৰপেটাৰোডৰ পৰা কোৱাৰেণ্টাইন কেন্দ্ৰলৈ লৈ যোৱা হয় ৷ ইয়াৰে তিনিখন বাছৰ যাত্ৰীসকলক কলগাছিয়াৰ নৱজ্যোতি কলেজৰ কোৱাৰেণ্টাইন কৰাৰ বাবে লৈ যোৱাৰ বিপৰীতে আন তিনিখন বাছৰ যাত্ৰীসকলক বৰবিলাৰ নেহৰু ছোৱালী হোষ্টেলত কোৱাৰেণ্টাইন কৰাৰ ব্যৱস্থা কৰিছে জিলা প্ৰশাসনে ৷

ইপিনে বিশেষ শ্ৰমিক ৰেলখন বৰপেটাৰোড ৰেলৱে' ষ্টেচন আহি পোৱাৰ পূৰ্বে বৰপেটাৰোড ৰেলৱে' ষ্টেচন মাষ্টাৰকে ধৰি ৰেলৰ শীৰ্ষ বিষয়া-কৰ্মচাৰী ,আৰ পি এফ, জি আৰ পি আৰু বৰপেটাৰোড আৰক্ষী থানাৰ বৃহৎ আৰক্ষীৰ দল এটিয়ে ব্যাপক নিৰাপত্তা ব্যৱস্থা কটকটীয়া কৰি তুলিছিল ৷ বৰপেটাৰোড ৰেলৱে' ষ্টেচন চৌহদৰ চাৰিওপিনে থকা পথসমূহত বেৰিকেড দি বন্ধ কৰি দিয়ে যাতে কোনো যাত্ৰীয়ে ৰেলৰ পৰা নামি পলায়ন কৰিব নোৱাৰে ৷ উল্লেখ্য যে, এই বিশেষ শ্ৰমিক ৰেলখন বুধবাৰেই বৰপেটাৰোড ৰেলৱে' ষ্টেচন আহি পোৱাৰ কথা আছিল যদিও এদিন পলমকৈ অৰ্থাৎ বৃহস্পতিবাৰে পুৱা পাঁচ বজাতহে বৰপেটাৰোড ৰেলৱে' ষ্টেচনত উপস্থিত হয় ৷

লগতে পঢ়কঃ তেলেংগানাত মে' মাহতো কৰ্তন হ'ব দৰমহা