জনীয়া,6 মে’: বৰপেটা জিলাৰ কলগাছিয়া বজাৰৰ ফেশ্যন হাব নামৰ কাপোৰৰ দোকানখনত বৃহস্পতিবাৰে সংঘটিত হয় প্ৰচণ্ড মাৰপিট । প্ৰতিষ্ঠানখনৰ গৰাকী আমিনুল ইছলামৰ বিৰুদ্ধে কৰ্মচাৰীসহ মাতৃক প্ৰহাৰ কৰি বাহিৰ কৰি দিয়াৰ অভিযোগ উত্থাপন । চিচিটিভিত বন্দী সমগ্ৰ দৃশ্য ।
ঘটনা সন্দৰ্ভত জানিব পৰা মতে, ফেশ্যন হাব নামৰ প্ৰতিষ্ঠানখনৰ কৰ্মচাৰী ছাদ্দাম হুছেইনে অসুস্থতাৰ বাবে বৃহস্পতিবাৰে দোকানলৈ আহিব নোৱাৰে ৷ কিন্তু দোকানখনৰ গৰাকী আমিনুল ইছলামে ফোন কৰি কৰ্মচাৰী ছাদ্দামক গালি-গালাজ কৰে ৷
পৰৱৰ্তী সময়ত ছাদ্দামৰ মাতৃ-ভাতৃয়ে ছাদ্দামক লগত লৈ ফেশ্যন হাবত উপস্থিত হৈ পৰিস্থিতিৰ বুজ ল’বলৈ চেষ্টা কৰে যদিও গৰাকী আমিনুলে তেওঁলোকৰ লগতো বাক-বিতণ্ডাত লিপ্ত হয় ৷ এই ঘটনাই পৰৱৰ্তী সময়ত প্ৰচণ্ড মাৰপিটৰ ঘটনালৈ ৰূপান্তৰিত হয় ৷ দোকানখনৰ গৰাকীয়ে কৰ্মচাৰীজনৰ লগতে মাতৃ-ভাতৃকো প্ৰহাৰ কৰে ৷
উক্ত ঘটনাত আহত হোৱা লোকসকলে কলগাছিয়া থানাত ঘটনা সন্দৰ্ভত এজাহাৰ দাখিল কৰে ৷ সম্প্ৰতি এই ঘটনাক কেন্দ্ৰ কৰি কলগাছিয়াত তীব্ৰ চাঞ্চল্যৰ সৃষ্টি হৈছে ।
লগতে পঢ়ক: কাছাৰত নিৰ্বাচনোত্তৰ হিংসা: আটক তিনি
