বৰপেটা,10 জুন : বৰপেটাৰ নসত্ৰৰ কৃষ্ণগুৰু সেৱাশ্ৰমত সোমবাৰে ভাৰতীয় ষ্টেট বেংকৰ এটা শাখা মুকলি কৰে মুখ্যমন্ত্ৰী সৰ্বানন্দ সোণোৱালে ৷ ষ্টেট বেংক অব ইণ্ডিয়াৰ উত্তৰ পূবৰ মুখ্য প্ৰৱন্ধক সুনীল কুমাৰ টেণ্ডন আৰু উত্তৰ-পূৱৰ প্ৰৱন্ধক সুধীৰ কুমাৰ শৰ্মাৰ উপস্থিতিত বেংকৰ শাখাটো মুকলি কৰে মুখ্যমন্ত্ৰীগৰাকীয়ে ৷ বেংকৰ শাখাটো মুকলি কৰি গ্ৰামাঞ্চলৰ মহিলাসকলকে ধৰি সকলো হিতাধিকাৰীয়ে চৰকাৰী বিভিন্ন আঁচনিৰ ধন লাভ কৰাৰ ক্ষেত্ৰত উপকৃত হোৱাৰ লগতে এই শাখাটোৰ জৰিয়তে অঞ্চলটোৰ আৰ্থ-সামাজিক ক্ষেত্ৰ,নিবনুৱা যুৱক যুৱতীসকলৰ কৰ্মসংস্থাপনৰ বাট মুকলি হ'ব বুলিও আশা ব্যক্ত কৰে মুখ্যমন্ত্ৰীগৰাকীয়ে ৷ উক্ত অনুষ্ঠানতে দেশৰ প্ৰধানমন্ত্ৰী নৰেন্দ্ৰ মোডীৰ প্ৰসংগ উত্থাপন কৰি নিবনুৱা যুৱক-যুৱতীসকলৰ লগতে বিশেষকৈ মহিলাসকলক স্বাৱলম্বী কৰাৰ ক্ষেত্ৰত উদ্যোগ লবলৈ বেংক কৰ্তৃপক্ষৰ প্ৰতি আহ্বান জনায় মুখ্যমন্ত্ৰী সোণোৱালে ৷
ইপিনে ছয়গাঁৱত ঈদৰ সাংস্কৃতিক অনুষ্ঠানত শিল্পীদলক উলংগ নৃত্য কৰিবলৈ অনুষ্ঠান পৰিচালনা সমিতিয়ে কৰা আহ্বান আৰু আক্ৰমণৰ ঘটনাক গৰিহণা দিয়ে মুখ্যমন্ত্ৰীগৰাকীয়ে ৷ তেওঁ কয় যে, "এয়া গৰিহণাৰ যোগ্য ৷ সকলোৱে একেমুখে এই কাৰ্যৰ নিন্দা কৰিছে ৷ ইতিমধ্যে দোষীসকলৰ বিৰুদ্ধে কঠোৰ শাস্তিমূলক ব্যৱস্থা গ্ৰহণৰ নিৰ্দেশ দিয়া হৈছে ৷" আনহাতে উক্ত সভাতে উচ্চতৰ মাধ্যমিক কলা শাখাত পঞ্চম আৰু দশম স্থান লাভ কৰা যোগমোহন কলিতা আৰু কৃপাময় দাসক বেংটোৰ তৰফৰ পৰা পাঁচ হাজাৰকৈ টকাৰ একোখন চেক প্ৰদান কৰে মুখ্যমন্ত্ৰীয়ে ৷
