জনীয়া,১৯ জুলাই : শেহতীয়া বানত বৰপেটা জিলাত বিস্তৰ ক্ষতি হোৱা দেখা গৈছে (Flood affects in Barpeta)। কেইবাটাও মূল পথ ধ্বংস হোৱা দেখা গৈছে । ইফালে বাঢ়নি পানীয়ে জিলাখনৰ গুৰুত্বপূৰ্ণ দলং উটুৱাই লৈ গৈছে । যাৰ বাবে বহু অঞ্চলৰ ৰাইজে যাতায়তৰ ক্ষেত্ৰত দুৰ্ভোগ ভূগিবলগীয়া হৈছে ।
তেনে এক পৰিৱেশ দেখিবলৈ পোৱা গৈছে জনীয়া সমষ্টিৰ অন্তৰ্গত কান্দাপাৰাত । চাউলখোৱা নদীৰ ওপৰত থকা কাঠৰ দলংখন বানে উটুৱাই লৈ যোৱাৰ ফলত যন্ত্ৰচালিত নাৱেৰে বিপদসংকুলভাবে যাতায়ত কৰিবলগীয়া হৈছে অঞ্চলটোৰ ৰাইজে (communication system in Barpeta)। অতি ভয়ংকৰ পৰিস্থিতিৰ মাজেৰে নিতৌ ছাত্ৰ-ছাত্ৰীসকলে নাৱেৰে যাত্ৰা কৰিবলগীয়া হৈছে ।
উল্লেখ্য যে জনীয়াৰ পৰা বৰপেটা আৰু মন্দিয়ালৈ যোৱা একমাত্ৰ পথৰ মাজত থকা চাউলখোৱা নৈৰ ওপৰত নিৰ্মাণ হৈ আছে পকী দলং । নিৰ্মীয়মান দলংখনৰ কাম শামুকীয়া গতিত হোৱাৰ বাবে বিভাগীয় কৰ্তৃপক্ষৰ হেঁচাত ঠিকাদৰে যাতায়ত কৰাৰ বাবে নিৰ্মাণ কৰি দিছিল এখন অস্থায়ী কাঠৰ দলং । কিন্তু শেহতীয়া বানত কাঠৰ দলঙৰ আধা অংশ বাঢ়নি পানীয়ে উটুৱাই লৈ যোৱাৰ ফলত মৰণক শৰণ দি নাৱেৰে অঞ্চলটোৰ ৰাইজে যাতায়ত কৰিবলগীয়া হৈছে ।
কিন্তু ৰাজ্যৰ বিভিন্ন ঠাইত নাও দুৰ্ঘটনা সংঘটিত হোৱাৰ পিছতো প্ৰশাসনে এই দৃশ্য দেখিও কোনো পদক্ষেপ হাতত লোৱা নাই । চাউলখোৱা নদীৰ ওপৰত নিৰ্মীয়মান দলঙৰ কাম অতি সোনকালে সম্পূৰ্ণ কৰিবলৈ দাবী জনাইছে ৰাইজৰ লগতে ছাত্ৰ-ছাত্ৰীসকলে ।
লগতে পঢ়ক :চিকিৎসালয়ৰ পৰা ওলায়েই ৰোগীৰ মৃত্যু: ডাম্পাৰে মহতিয়াই নিলে ৰোগীক
