বৰপেটা, ১৫ এপ্ৰিল: আজি পহিলা ব'হাগ । অসমবাসীয়ে পালন কৰিছে হেঁপাহৰ ৰঙালী বিহু(Rangali Bihu 2022) । চৌদিশ মুখৰিত ঢোল-পেঁপা গগনাৰ মাতত । কঁকাল ঘূৰাই এপাক নাচিছে সকলোৱে । ব্যতিক্ৰম নহয় বৰপেটা ।
বৰপেটাৰ বিহু মূলতঃ সত্ৰকেন্দ্ৰিক(Bihu in Barpeta Satra) । বৰপেটাত ঢোল পেঁপা গগনা বিহু নামৰ পৰিৱৰ্তে সম্পূৰ্ণ সত্ৰীয়া ৰীতিৰে পৰিশীলিত ৰূপত পালন কৰা হয় ব'হাগ বিহু ৷ বৰপেটাত স্থানীয় ভাষাত ব'হাগ বিহুক কোৱা হয় বৈহাগ'ৰ দোমাহি ৷
চ'তৰ সংক্ৰান্তিৰ পৰা সাতদিন জুৰি পালন কৰা বৈহাগ’ৰ দোমাহিৰ আজি পহিলা ব’হাগৰ দিনটোত বৰপেটা সত্ৰত পালন কৰা হৈছে বৰ দোমাহি ৷ বৰ দোমাহি উপলক্ষে সত্ৰত সেৱা জনাবলৈ সত্ৰবাসী ভক্তপ্ৰাণ লোকসকল আহি সত্ৰত ভিৰ কৰিছে ৷ পুৱা নাম-প্ৰসংগৰ পিছত সত্ৰৰ গায়ন বায়নে গুৰুঘাট বজায় ৷
হৰিনামৰ অমিয়া সুৰ, গায়ন বায়নৰ ভক্তিভাৱপূৰ্ণ খোলৰ চেও আৰু ভকতিৰ ৰসত বুৰ গৈছে বৰপেটা সত্ৰ চৌহদ । পহিলা ব’হাগৰ দিনটোত সত্ৰত আঠুলৈ গুৰু দুজনাৰ আৰ্শীষ প্ৰাৰ্থনা কৰিছে ভক্তসকলে ৷
পুৱাৰ প্ৰসংগৰ পিচতে বৰপেটা সত্ৰত বৰ্ষফল গণনা আৰম্ভ হ’ব ৷ সত্ৰৰ দৈৱজ্ঞই কৰা বৰ্ষফল গণনা শুনিবলৈ শুকুৰবাৰে সত্ৰখনত সমবেত হ’ব বৰপেটাৰ প্ৰতিজন লোক ৷ সত্ৰৰ কীৰ্তনঘৰৰ ভিতৰত প্ৰথমতে বৰ্ষফল গণনাৰ পিচতেই সত্ৰৰ মঠৰ চোতাল আৰু আইসকলে প্ৰসংগ কৰা কাঠিত পাঠ কৰা হ‘ব বৰ্ষফল গণনা ৷
লগতে পঢ়ক: Rangali bihu in Assam: ঐতিহাসিক আউনীআটী সত্ৰত 369 বছৰীয়া পৰম্পৰাৰে উদযাপন বোকাখেল
