নিয়ম নে ৰেগিং ? বৰপেটা চিকিৎসা মহাবিদ্যালয়ৰ নৱাগত ছাত্ৰই নিশা দুপৰলৈকে কিয় থাকিল চেলুনত ?

বৰপেটা চিকিৎসা মহাবিদ্যালয়ৰ ছাত্ৰাৱাসত উত্থাপিত হৈছে ৰেগিঙৰ অভিযোগ ৷ নিশা ৯-৩০ বজালৈকে বৰপেটা চহৰৰ চেলুনত নৱাগত ছাত্ৰই চুলি কাটিবলৈ যোৱাক লৈ সন্দেহ ৷ মহাবিদ্যালয়খনৰ অধ্যক্ষ ডাঃ ধ্ৰুৱজ্যোতি বৰাৰ ঘটনাক লৈ প্ৰতিক্ৰিয়া

বৰপেটা, 21 আগষ্টঃ বৰপেটা চিকিৎসা মহাবিদ্যালয়ত নৱাগত ছাত্ৰক ৰেগিঙৰ নামত মহাবিদ্যালয় খনৰ একাংশ জ্যেষ্ঠ ছাত্ৰই আতিশয্য চলোৱাৰ ঘটনা পোহৰলৈ আহিছে৷ জানিব পৰা মতে, চিকিৎসা মহাবিদ্যালয় খনৰ ভকতপাৰাত থকা ছাত্ৰাবাসৰ নৱাগত আবাসী সকলে জ্যেষ্ঠ আবাসী সকলৰ নিৰ্দেশ মতে মঙলবাৰে নিশা বৰপেটা চহৰৰ চেলুনত চুলি চুটিকৈ কাটিছিল ৷ পৰৱৰ্তী সময়ত একাংশ নৱাগত ছাত্ৰৰ অভিভাৱকে এই সম্পৰ্কে সাংবাদিকক অভিযোগ দিয়াৰ পাছতেই ঘটনাটোক লৈ বৰপেটা চহৰত তীব্ৰ চাঞ্চল্যৰ সৃষ্টি হয় ৷ তাৰ পাছতেই নিশাই চেলুনত উপস্থিত হৈ চুলি কাটিবলৈ অহা ছাত্ৰসকলক সাংবাদিকে চুলি কটাৰ কাৰণ সোধাৰ লগতে তেওঁলোক ৰেগিঙৰ বলি হৈছে নেকি বুলি প্ৰশ্ন সোধে যদিও ৰহস্যজনক ভাৱে ছাত্ৰ সকলে স্পষ্ট উত্তৰ দিয়াৰ পৰা বিৰত থাকিল ৷ তাৰ বিপৰীতে তেওঁলোকে " আমি কেৱল নিয়ম পালন কৰিছো, কোনো ধৰণৰ ৰেগিং আমাৰ লগত সংঘটিত হোৱা নাই বুলিহে" জানিবলৈ দিয়ে ৷

ইপিনে বৰপেটা মেডিকেল কলেজৰ অধ্যক্ষ ডাঃ ধ্ৰুৱজ্যোতি বৰাই বুধবাৰে এই ঘটনাক লৈ প্ৰতিক্ৰিয়া প্ৰকাশ কৰে ৷ অধ্যক্ষ গৰাকীয়ে মঙলবাৰে নিশালৈকে হোষ্টেলৰ নৱাগত আৱাসীয়ে চুলি কটাটো সত্য বুলি জানিবলৈ দিয়ে ৷ কিন্তু নৱাগত ছাত্ৰ সকলে নিশা হোষ্টেলৰ পৰা ওলাই আহি প্ৰায় ৯-৩০ বজালৈকে বৰপেটা চহৰৰ চেলুনত চুলি কাটিবলৈ যোৱা সম্পৰ্কে অধ্যক্ষ গৰাকী অৱগত নহয় বুলি মন্তব্য কৰে ৷ ইয়াৰোপৰি ৰেগিঙৰ ক্ষেত্ৰত 'জিৰো ট'লাৰেঞ্চ'ৰ ভূমিকাৰ কথা ব্যক্ত কৰিও মঙলবাৰৰ নিশাৰ ঘটনাটোক ৰেগিং বুলি নাভাৱে বুলিহে আজব মন্তব্য কৰে অধ্যক্ষ গৰাকীয়ে ৷ অৱশ্যে বৰপেটা মেডিকেল কলেজত ঘটা ৰেগিঙৰ ঘটনাটোৰ তদন্তৰ বাবে ইতিমধ্যে কলেজখনৰ উপাধ্যক্ষক দায়িত্ব প্ৰদান কৰিছে অধ্যক্ষই ৷ আনকি হোষ্টেলৰ দায়িত্বত থকা অধীক্ষককো ঘটনা সম্পৰ্কে লিখিতভাৱে জনাবলৈ নিৰ্দেশ দিছে অধ্যক্ষ ডাঃ ধ্ৰুৱজ্যোতি বৰাই ৷