জনিয়া, 24 আগষ্ট : নিজৰ গাঁঠিৰ ধন ব্যয় কৰি কলগাছিয়াৰ ৰাইজে নিমাৰ্ণ কৰিলে বাঁহৰ দলং ৷ কলগাছিয়াৰ ৰাজহচক্ৰৰ অন্তৰ্গত কলগাছিয়াৰ পৰা বৰপেটালৈ যোৱা একমাত্ৰ ৰাস্তাটোৰ ওপৰত আছে আমগুৰি পকী দলংখন ৷ বানপানী ফলত বিধ্বস্ত হয় গড়কাপ্তানী পথটোত থকা এই পকী দলংখনৰ লগতে উক্ত অঞ্চলটোৰ প্ৰায় তিনি কি.মি. পথ ৷ ফলত কলগাছিয়া, বলাইপাথাৰ, খাৰবাল্লি, আমগুৰি, ডিমাপুৰ গাঁৱৰ শ শ ৰাইজে যাতায়তৰ ক্ষেত্ৰত বহু অসুবিধাৰ সন্মুখীন হ'বলগীয়া হৈছে । লগতে বঞ্চিত হ'ব লগা হৈছে ১০৮ এম্বুলেন্স সেৱা, অগ্নিনিৰ্বাপক বাহিনীৰ জৰুৰীকালীন সেৱাৰ পৰা । জনপ্ৰতিনিধি সকলে দলং নিৰ্মাণৰ প্ৰতিশ্ৰুতি দিয়ে যদিও কাৰ্যত সেয়া হৈ নুঠে । উল্লেখযোগ্য যে, দলঙখনৰ পৰা পৰি মাজে মাজে দুৰ্ঘটনাও সংঘটিত হৈ আছে । গতিকে স্থানীয় ৰাইজ আৰু ভেটাৰী গাড়ী সন্থাৰ তৰফৰ পৰা মঙলবাৰে দলঙৰ ভাঙি যোৱা অংশটোত ৰাইজে নিজাববীয়াকৈ এখন বাঁহৰ দলং নিৰ্মাণ কৰে ৷ আনহাতে সংবাদ মাধ্যমৰ যোগেদি অতি শীঘ্ৰে পথটো মেৰামতি কৰিবলৈ চৰকাৰক দাবী উত্থাপন কৰিছে কলগাছিয়াবাসী ৰাইজে ৷
ইপিনে বিধ্বস্ত পথ নিৰ্মাণৰ দাবীত মহানগৰীৰ জালুকবাৰী সমীপৰ বৰাগাঁওবাসীৰ তীব্ৰ প্ৰতিবাদী কাৰ্যসূচী ৷ চৰকাৰৰ বিৰুদ্ধে ৰাজপথত ওলাই আহিল বৰাগাঁৱৰ ৰাইজ । হাতে হাতে প্লে'কাৰ্ডলৈ প্ৰতিবাদ সাব্যস্ত কৰিলে ৰাইজে । চৰকাৰ গ'বেক, ন' ৰ'ড, ন' ভোট আদি শ্ল'গানেৰে উত্তাল প্ৰতিবাদ বৰাগাঁওবাসীৰ । ঘটনা অনুসৰি বৰাগাঁও বিজ্ঞান পথটো দীৰ্ঘদিন ধৰি জৰাজীৰ্ণ অৱস্থাত আছে । অত্যাধিক বোজাৰ বাহনৰ আহ-যাহ কৰাৰ ফলত পথটোত সৃষ্টি হৈছে পুখুৰী সদৃশ গাঁতৰ । এজাক বৰষুণ দিলেই পানীৰ তলত ডুব যায় এই পথচোৱা । যাৰ পৰিণতিত বহু দুৰ্ঘটনাও সংঘটিত হৈছে পথটোত । বাৰম্বাৰ স্থানীয় বিধায়ক তথা চৰকাৰৰ ওচৰত আবেদন কৰিও কোনো বৰ্তমানলৈ কোনো সুফল নাপালে বৰাগাঁওবাসীয়ে ৷ গতিকে পৰিৱৰ্তনৰ সপোন দেখুৱাই গাদী দখল কৰা সোণোৱাল চৰকাৰক প্ৰতিবাদী কাৰ্যসূচীৰ জৰিয়তে শেষ সকিয়নী দিয়ে বৰাগাঁওবাসী ৰাইজে । অতিশীঘ্ৰে পথচোৱা মেৰামতি কৰি যাতায়তৰ বাবে সুচল নকৰিলে জনপ্ৰতিনিধি প্ৰৱেশ নিষিদ্ধ কৰাৰ লগতে ভোট বৰ্জন কৰাৰো হুংকাৰ দিয়ে ক্ষোভিত ৰাইজে ।
