অগপ চৰকাৰৰ দিনত বানাক্ৰান্তই বানৰ 6 মাহ পাচতো পাইছিল বানসাহায্যঃ প্ৰফুল্ল মহন্ত

বান পৰিস্থিতিৰ বুজ লোৱাৰ বাবে শুকুৰবাৰে বৰপেটাত উপস্থিত হয় ৰাজ্যৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত ৷ বৰপেটাত উপস্থিত হৈ প্ৰাক্তন মুখ্যমন্ত্ৰী গৰাকীয়ে বৰপেটাৰ বান আক্ৰান্ত লোকে আশ্ৰয় লোৱা শিবিৰ পৰিদৰ্শন কৰে ৷

বৰপেটা, ২৪ জুলাইঃ শুকুৰবাৰে বান পৰিস্থিতিৰ বুজ ল’বলৈ বৰপেটাত উপস্থিত হয় ৰাজ্যৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত ৷ তেওঁ জিলাখনত উপস্থিত হৈ আশ্ৰয় শিবিৰ সমূহ পৰিদৰ্শন কৰি চৰকাৰক বিশেষ ব্যৱস্থা ল’বলৈ আহ্বান জনায় ৷ লগতে তেওঁ মুখ্যমন্ত্ৰী হৈ থকা দিনত অসমৰ বানপীড়িত ৰাইজে বান পানীৰ সময়ৰ পৰা আৰম্ভ কৰি বান শেষ হোৱাৰ 6 মাহৰ পিচলৈ বান সাহায্য লাভ কৰি আছিল বুলি উল্লেখ কৰে ৷

বান পৰ্যবেক্ষণৰ পাচত সাংবাদিকৰ সৈতে হোৱা কথা বতৰাত তেওঁ ১৯৫০ চনৰ পৰাই অসমৰ ৰাইজে বান খহনীয়া সমস্যাৰ সন্মুখীন হৈ অহাৰ প্ৰসংগ উত্থাপন কৰে ৷ বান খহনীয়া সমস্যা সমাধনাৰ বাবে কেন্দ্ৰীয় চৰকাৰক সহায় আগবঢ়াবলৈয়ো আহ্বান জনোৱাৰ লগতে কেন্দ্ৰৰ পৰা ৰাজ্য চৰকাৰে লাভ কৰা সাহায্য পুঁজিৰে বানপীড়িতক সাহায্য দিবলৈ আহ্বান জনায় প্ৰফুল্ল কুমাৰ মহন্তই ৷

বৰপেটাত উপস্থিত ৰাজ্যৰ প্ৰাক্তন মুখ্যমন্ত্ৰী প্ৰফুল্ল কুমাৰ মহন্ত

আনহাতে ৰাজ্যত অব্যাহত থকা মূল্যবৃদ্ধিৰ প্ৰসংগও উত্থাপন কৰি এইক্ষেত্ৰত সামগ্ৰীৰ দাম নিয়ন্ত্ৰণৰ আহ্বান জনায় ৰাজ্য চৰকাৰৰ সহযোগী দল অগপৰ নেতাগৰাকীয়ে ৷ মহন্তই সাম্প্ৰতিক ৰাজনৈতিক পৰিস্থিতিৰ লগতে নাগৰিকত্ব সংশোধনী আইনক লৈয়ো মন্তব্য কৰে ৷ অসম চুক্তিক অৱমাননা কৰা এই আইনৰ বিৰোধীতা কৰি যাব বুলি তেওঁ স্পষ্ট কৰে ৷

তাৰোপৰি নতুন আঞ্চলিক ৰাজনৈতিক দল গঠন সম্পৰ্কে মন্তব্য কৰি অসমৰ সমস্যা আঞ্চলিক দলেহে সমাধান কৰিব পাৰিব বুলিও প্ৰকাশ কৰে ৷

লগতে পঢ়কঃ মহানগৰীত ক'ভিডৰে যুঁজি সুস্থ হোৱা চিকিৎসা কৰ্মীক উলিয়াই দিলে ঘৰৰ মালিকে