জনীয়া, 24এপ্ৰিলঃ ৰাজ্যৰ অন্যান্য প্ৰান্তৰ দৰে বৰপেটা জিলাতো দিনকে দিনে বৃদ্ধি পাইছে ক'ভিডত আক্ৰান্তৰ সংখ্যা ৷ তাৰ মাজতে ক'ভিড প্ৰট’কল অমান্য তথা চৰকাৰী নীতি-নিৰ্দেশনা মানি নচলা একাংশ লোকৰ ওপৰত কঠোৰ হৈছে কলগাছিয়া প্ৰশাসন । মাস্ক পৰিধান নকৰা সকলক চক্ৰ বিষয়া দীপাংকৰ কলিতাৰ উপস্থিতিত আৰক্ষীয়ে বিহিছে জৰিমনা ।
ইফালে এজন মটৰ চাইকেল আৰোহীক জৰিমনা বিহাক কেন্দ্ৰ কৰি পুলিচে মটৰ চাইকেল আৰোহী জনৰ পকেটত হাত দিয়াৰ বাবেই উত্তপ্ত পৰিস্থিতিৰ সৃষ্টি হয় । একেদৰে আৰক্ষীয়ে ক’ভিড নীতি নমনা সকলৰ পৰা জৰিমনা লৈ আছে যদিও আৰক্ষীয়েও সামাজিক দূৰত্ব বজাই নৰখাত একাংশ ৰাইজে সমালোচনা কৰিছে ।
উল্লেখযোগ্য যে, দেশব্যাপী ভয়াৱহ ৰূপ ধাৰণ কৰা ক'ৰণা মহামাৰীক প্ৰতিহত কৰিবলৈ আৰু ৰাইজক সজাগ কৰিবলৈ প্ৰশাসন তথা চৰকাৰে বাৰম্বাৰ আহ্বান জনোৱাৰ পিছতো একাংশই ক'ভিড প্ৰট’কল অমান্য কৰা পৰিলক্ষিত হৈছে ।
লগতে পঢ়কঃ ONGC তিনি বিষয়াৰ অপহৰণ সন্দৰ্ভত আলফা (স্বাধীন)ৰ প্ৰেছ বিবৃতি
