বৰপেটা, 23 জুলাই : ৰাজ্যত কৰ'ণা মহামাৰী আৰু বানপানীয়ে সন্ত্ৰাস চলাই থকাৰ সময়তে বৃহস্পতিবাৰে বৰপেটা জিলাত এক বৃহৎ পৰিমাণৰ চোৰাং চাউল জব্দ কৰা হয় ৷ বৰপেটাৰ হাউলীত আৰক্ষীৰ সহযোগত জিলা প্ৰশাসনে অভিযান চলাই জব্দ কৰে ৰাজহুৱা বিতৰণ ব্যৱস্থাৰ (PDS) বৃহৎ পৰিমাণৰ চোৰাং চাউল ৷
তথ্য অনুসৰি, হাউলীৰ ৩১নং ৰাষ্ট্ৰীয় ঘাইপথৰ কাষৰ বিছমিল্লাহ ধাবাত অভিযান চলাই জিলা প্ৰশাসনে জব্দ কৰে ৰাজহুৱা বিতৰণ ব্যৱস্থাৰ ১৭০ বস্তা চাউল ৷ হাউলী আৰক্ষী আৰু যোগান বিভাগৰ সহযোগত বৰপেটাৰ অতিৰিক্ত উপায়ুক্ত সব্যাসাচী কাশ্যপ আৰু নৱজিৎ পাঠকৰ নেতৃত্বত বিছমিল্লাহ ধাবাত অভিযান চলাই চোৰাং চাউলৰ বস্তাসমুহ জব্দ কৰে ৷ ইপিনে ধাবা খনৰ পৰা বস্তা চিলাই কৰা মেচিন এটাও জব্দ কৰে প্ৰশাসনে ৷
জানিব পৰা মতে,ধাবাখনত গোপনে ৰাজহুৱা বিতৰণ ব্যৱস্থাৰ চাউলৰ বস্তা সমুহৰ লেবেল সলনি কৰি নতুনকৈ চিলাই কৰি থোৱা হৈছিল ৷ চাউলৰ এই চোৰাং ব্যৱসায়ৰ সতে জড়িত দুই ব্যৱসায়ী নজৰুল ইছলাম আৰু আমজাদ হুছেইন সম্প্ৰতি পলাতক বুলি জানিব পৰা গৈছে ৷
উল্লেখ্য যে,বৰপেটাত চলি থকা ৰাজহুৱা বিতৰণ ব্যৱস্থাৰ চাউল মেঘালয়ৰ লগতে বাংলাদেশলৈয়ো চালান হোৱাৰ অভিযোগ উত্থাপিত হৈ আহিছে ৷
লগতে পঢ়ক : কৰিমগঞ্জত উদ্ধাৰ মাতৃ-পুত্ৰৰ মৃতদেহ
