বৰপেটা, ১৪ জুন : একালত বছৰৰ ১২ মাহে খেতি-বাতিৰে নদন বদন পথাৰখন এতিয়া বছৰৰ ১২ মাহেই থাকে পানীৰ তলত ৷ একাংশ সংখ্যালঘু সম্প্ৰদায়ৰ লোকে পল্লা নৈৰ জান এটা বেদখল কৰি গাঁও গঢ়ি তোলাৰ পিচতেই পথাৰখনৰ পৰা পানী ওলাই যাব নোৱাৰি এতিয়া এই অৱস্থা খেতিপথাৰখনৰ ৷ ফলত মৈৰামাৰী গাঁওবাসীৰ সন্মুখত সৃষ্টি হৈছে গভীৰ আৰ্থিক সংকটৰ ৷
গাঁওবাসীৰ অভিযোগ, পল্লা নৈৰ জানটোৰ লগতে শ্লু’ইছ গেটখনো বন্ধ কৰি একাশই ঘৰ দুৱাৰ, বাট পথ নিৰ্মাণ কৰি পথাৰৰ পানীভাগ ওলাই যোৱা পথসমূহ বন্ধ কৰি দিয়াৰ পৰিণাম ভুগিছে গাঁওবাসীয়ে ৷ গাঁওবাসীয়ে কলে, ঐতিহাসিক পল্লা নৈৰ ঘাটটোত মৈৰামাৰা গাঁওবাসীয়ে মহাত্মা গান্ধীৰ চিতাভস্ম বিসৰ্জন দিছিল ৷ এনে এটা ঐতিহাসিক ঘাটৰো এতিয়া কোনো চিন মোকামেই নোহোৱা কৰিছে বেদখলকাৰীয়ে ৷
পূৰ্বে প্ৰশাসনে এবাৰ জানটো বেদখলমুক্ত কৰিছিল যদিও পুনৰ একেই আগ্ৰাসন বেদখলকাৰীৰ ৷ ফলত মৈৰামাৰা গাঁওবাসীৰ কি কৰো, ক'লৈ যাঁও অৱস্থা ৷ তথাপি চৰকাৰৰ বেদখল উচ্ছেদ নীতিত সন্তুষ্ট গাঁওবাসীৰ দাবী, জানটো মুকলি কৰি পথাৰখনৰ পানীভাগ ওলাই যোৱাৰ ব্যৱস্থা হাতত লওক চৰকাৰ প্ৰশাসনে ৷ আনকি বৰপেটা জিলা প্ৰশাসনৰ লগতে বৰপেটাৰ অভিভাৱক মন্ত্ৰী ৰণজিৎ কুমাৰ দাসকো সমস্যাটোৰ কথা অৱগত কৰিছে গাঁওবাসীয়ে ৷ এতিয়া চৰকাৰে জানটো বেদখলমুক্ত কৰি মৈৰামাৰা গাঁৱৰ কৃষকসকলৰ সমস্যা কিদৰে সমাধান কৰে তালৈ গাওবাসীয়ে আগ্ৰহেৰে বাট চাইছে ৷
লগতে পঢ়ক : উদালী কাণ্ডৰ লগত জড়িত দুজন অভিযুক্তক গ্ৰেপ্তাৰ
