বৰপেটাৰোড, 6 ডিচেম্বৰ : দেওবাৰে মানাহ ৰাষ্ট্ৰীয় উদ্যানত সংঘটিত হৈছে এক অঘটন ৷ প্ৰাকৃতিক সৌন্দৰ্য উপভোগ কৰিবলৈ আহি মৃত্যুক আঁকোৱালি ল'লে এগৰাকী পৰ্যটকে ৷ মানাহ ৰাষ্ট্ৰীয় উদ্যানৰ গাতে লাগি থকা বেকী নৈত সলিল সমাধি ঘটে চন্দন চৌধুৰী নামৰ এজন লোকৰ ৷ নাওত উঠি আনন্দ উপভোগ কৰি থকা অৱস্থাতে হঠাতে নাওৰ পৰা বেকী নৈত পৰি মৃত্যু হয় লোকজনৰ । বজালীৰ পাঠশালাৰ পৰা আহিছিল মানাহ ৰাষ্ট্ৰীয় উদ্যানলৈ বনভোজ খাবলৈ আহিছিল চন্দন চৌধুৰী সহ পৰিয়ালটো।
লোকজনৰ বেকী নৈত নিখোজ হোৱাৰ লগে লগে এছ ডি আৰ এফ বাহিনীক খবৰ দিয়া হয় ৷ প্ৰশাসন আৰু স্থানীয় ৰাইজৰ সহযোগত প্ৰায় ২ ঘন্টা পাছত চন্দন চৌধুৰীৰ মৃতদেহ উদ্ধাৰ কৰিবলৈ সক্ষম হয় এছ ডি আৰ এফ বাহিনীয়ে ৷
নাওত পৰ্যাপ্ত পৰিমাণৰ সা-সুবিধা নথকাৰ বাবে লোকজনৰ মৃত্যু ঘটা বুলি অভিযোগ উত্থাপন কৰিছে দল-সংগঠনে । লোকজনৰ সলিল সমাধি ঘটাত গভীৰ শোকৰ ছাঁ পৰিছে অঞ্চলটোত ৷
লগতে পঢ়ক: খৰালিৰ খহনীয়াত বিধ্বস্ত পকণীয়াবাসী
