বৰপেটা, ১৪ জুন: বৰ্তমান মহামাৰীৰে যুঁজ দিয়াৰ বাবে সাধ্য অনুসাৰে ব্যক্তি অথবা প্ৰতিষ্ঠানে চৰকাৰ তথা প্ৰশাসনক সহায় কৰিছে । কোনোৱে যদি মুখ্যমন্ত্ৰীৰ সাহায্য পুঁজিলৈ বৰঙণি আগবঢ়াইছে, আন কোনোৱে আকৌ নিজাববীয়াকৈ মানুহৰ মাজত মাস্ক, ছেনিটাইজাৰ বিতৰণ কৰিছে ।
মুঠতে সকলোৱে মাৰাত্মক কৰ'ণা ভাইৰাছৰ সংক্ৰমণ প্ৰতিৰোধ কৰাৰ প্ৰয়াস কৰিছে । এনে সংকটৰ সময়ত ভাৰতীয় জীৱন বীমা নিগমো(LIC) সহায় কৰাৰ উদ্দেশ্যেৰে আগবাঢ়ি আহিছে । সোমবাৰে ভাৰতীয় জীৱন বীমা নিগমৰ বঙাইগাঁও আঞ্চলিক কাৰ্যালয়ৰ তৰফৰ পৰা বৰপেটা জিলা প্ৰশাসনক ২০০টা পি পি ই কিট(P P E Kit) আৰু ১ হাজাৰ খন N95 মাস্ক(N95 Mask) আগবঢ়োৱা হয় ।
বৰপেটাৰ জিলা উপায়ুক্তৰ কাৰ্যালয়ত উপস্থিত হৈ বৰঙণি হিচাপে এই সামগ্ৰীখিনি উপায়ুক্ত তেজ প্ৰসাদ ভূচালৰ হাতত অৰ্পণ কৰে জীৱন বীমা নিগমৰ বঙাইগাঁও আঞ্চলিক কাৰ্যালয়ৰ প্ৰৱন্ধক টি এন ভূটীয়াই । বঙাইগাঁও আঞ্চলিক কাৰ্যালয় কৰ্তৃপক্ষই ইতিমধ্যে চিৰাং, গোৱালপাৰা, বঙাইগাঁও, ধুবুৰী আদি জিলাসমুহতো পি পি ই কিট আৰু মাস্ক প্ৰদান কৰা হৈছে বুলি প্ৰৱন্ধকগৰাকীয়ে জানিবলৈ দিয়ে ৷
ইপিনে, (LIC)ৰ গ্ৰাহকসকলৰ সুবিধাৰ বাবে নিগমৰ কাৰ্যালয়সমূহত এতিয়া বিএছএনএল(BSNL)ৰ লগতে এয়াৰটেল(AIRTEL) নেট সংযোগ কৰা হৈছে বুলি জানিবলৈ দিয়ে ৷ গ্ৰাহকসকলে প্ৰিমিয়াম দিবলৈ গৈ নেটৰ বাবে পূৰ্বে সন্মুখীন হোৱা সমস্যা এতিয়া আৰু নাথাকিব বুলিও প্ৰৱন্ধকগৰাকীয়ে জানিবলৈ দিয়ে ৷
তাৰোপৰি যিবিলাক জিলা সদৰত ভাৰতীয় জীৱন বীমা নিগমৰ নিজা কাৰ্যালয় নাই সেইবোৰ জিলাত চৰকাৰী ভূমি আবন্টন পালে নিজা কাৰ্যালয় স্থাপন কৰিব বুলিও জানিবলৈ দিয়ে প্ৰৱন্ধকগৰাকীয়ে ৷
লগতে পঢ়ক:যোৰহাট চিকিৎসা মহাবিদ্যালয়ত সংযোজন ১২০ খন বিচনা
