কলগাছিয়া, 20 মে’: কলগাছিয়াৰ জমেৰকুৰত ধানৰ পৰিৱৰ্তে ওলাইছে পতান । যাৰ ফলত খেতিত জুই লগাই ক্ষতিগ্ৰস্ত কৃষকে সাব্যস্ত কৰিছে প্ৰতিবাদ । শ শ বিঘা খেতিত ধান পতান হোৱাত এতিয়া মূৰে কপালে হাত দিব লগা হৈছে কৃষকে ।
উল্লেখ্য যে, চৰকাৰী অনুজ্ঞাপ্ৰাপ্ত PRUTHVI HYBRID PADDY SEEDS SE - 5252 ধানৰ বীজেৰে বৰনগৰ কৃষি চক্ৰৰ জমেৰকুৰ, বৰদাংগা, খাটাকুচি আদি গাঁৱৰ শ শ খেতিয়কে এইবেলি ইৰি ধানৰ খেতি কৰিছিল যদিও পথাৰত প্ৰায় ৭০/৮০ বিঘা ধানৰ খেতিত ধানৰ পৰিৱৰ্তে পতান হোৱাত মূৰে কপালে হাত দিব লগা হৈছে খেতিয়কে । ধানৰ গা-গছ হৈছে যদিও সিঁজ ওলোৱাৰ লগে লগে মৰহি গৈ ধানত চাউলৰ পৰিৱৰ্তে পতান হোৱাত চৰম ক্ষতিৰ সন্মুখীন হৈছে খেতিয়ক সকল ।
বৃহস্পতিবাৰে জমেৰকুৰৰ গাঁৱৰ ক্ষতিগ্ৰস্ত একাংশ কৃষকে পতান ধাননিত জুই লগাই দি বিভিন্ন শ্ল’গানেৰে চৰকাৰৰ বিৰুদ্ধে প্ৰতিবাদ সাব্যস্ত কৰাৰ লগতে ক্ষতিগ্ৰস্ত খেতিয়কৰ ক্ষতিপূৰণ দাবী জনায় । স্থানীয় চি পি এম নেতা ৰুস্তম আলিয়ে পতান খেতি সমূহ পৰিদৰ্শন কৰি খেতিয়ক সকলৰ বাবে যথাযথ ক্ষতিপূৰণ দাবী জনায় ।
আনহাতে দুই বছৰ পূৰ্বেও বৰপেটা, দৰং আৰু বঙাইগাঁও জিলাৰ ৩৮৮৫ হেক্টৰ মাটিত ইৰিধানৰ খেতিত পতান হৈছিল ৷ কৃষকৰ ধাৰাবাহিক আন্দোলনৰ ফলত চৰকাৰে ৫ কোটি ৭৫ লাখ ৫০০ টকা ক্ষতিপূৰণ ঘোষণা কৰিছিল যদিও আজিলৈকে ক্ষতিগ্ৰস্ত কৃষকে এটকাও ক্ষতিপূৰণ নোপোৱাৰ অভিযোগ উত্থাপন হৈছে ।
লগতে পঢ়ক: ভালখবৰ : অসমত ক’ভিড আক্ৰান্তৰ হাৰ ৬.০২ শতাংশলৈ হ্ৰাস
