জনিয়া, 11 অক্টোবৰঃ জনিয়া সমষ্টিৰ উপ-নিৰ্বাচনৰ দিন চমু চাপি অহাৰ লগে লগে জনিয়া সমষ্টিত কংগ্ৰেছ, এ আই ইউ ডি এফৰ সমান্তৰালকৈ বিজেপিৰো প্ৰচাৰ অভিযান তুংগত । সমষ্টিটোৰ বিভিন্ন ঠাইত ভোটাৰক আকৰ্ষিত কৰাৰ বাবে জোৰদাৰ প্ৰচাৰ চলাইছে বিজেপি দলে । বৃহস্পতিবাৰে জনিয়া সমষ্টিৰ ভোগেৰআণ্ডাত বিজেপি প্ৰাৰ্থী তৌফিকুৰ ৰহমানৰ হৈ নিৰ্বাচনী প্ৰচাৰ চলায় বিজেপি নেতা শ্বহিদুল ইছলামে। নিৰ্বাচনী প্ৰচাৰ সভাৰ ভাষণ প্রসংগত শ্বহিদুল ইছলামে জনিয়াত ৮ খন পঞ্চায়তলৈ এখন খণ্ড উন্নয়নৰ পোষকতা কৰি খণ্ড উন্নয়নৰ বাবে তেজ দিব বুলিও মন্তব্য কৰে।
আনহাতে সাংবাদিকৰ সৈতে হোৱা সাক্ষাৎকাৰত চালানী প্ৰাৰ্থী প্ৰক্ষেপ কৰা সন্দৰ্ভত কৰা প্ৰশ্নৰ উত্তৰত কয়, " তৌফিকুৰ ৰহমান যদি চালানী হয় তেন্তে মনমোহন সিং, সঞ্জয় সিং কেনেকৈ সাংসদ হৈছিল । তৌফিকুৰ ৰহমান অসমৰ এজন সুযোগ্য সন্তান তেওঁ অসমৰ হৈ কেনেকৈ চালানী হ'ল ।" ইয়াৰোপৰি বিজেপিৰ টিকট নোপোৱা সন্দৰ্ভত জনীয়া সমষ্টিৰ ক্ষেত্ৰত দলে মোতকৈ যোগ্য প্ৰাৰ্থী প্ৰক্ষেপ কৰিছে আৰু দলে যি সিদ্ধান্ত লৈছে তাক মই স্বাগতম জনাইছো বুলি মন্তব্য কৰে শ্বহিদুল ইছলামে ।
