বৰপেটা, ২ মে’: বৰপেটা আৰক্ষী ছাউনীত কটকটীয়া নিৰাপত্তাৰ মাজত শ শ ছাগলী (Goats seized in Barpeta)৷ মাতি অনা হয় বহু ছাগলী পালকক ৷ ভিৰৰ মাজৰ পৰা ছাগলী পালকসকলে চিনাক্ত কৰে নিজৰ নিজৰ হেৰোৱা ছাগলী ৷ এই ঘটনা বৰপেটাৰ ৷ ছাগলী চোৰৰ আতংকই টোপনি হৰিছে বৰপেটাবাসীৰ ৷
বৰপেটা জেইলৰোড, তেতেলীৰ তল, পাটবাউসী, কেওটকুছি, কাঁহিবাৰী, গজিয়া, জনীয়া সুন্দৰীদিয়া আদিকে ধৰি বৰপেটাৰ সৰ্বত্ৰ এতিয়া ছাগলী চোৰৰ সন্ত্ৰাস ৷ বাট-পথ, পথাৰ, ছাগলী গৰালৰ পৰা দিন অথবা নিশাৰ ভাগত চুৰি হৈছে শ শ ছাগলী ৷ পশুপালনেৰে জীৱিকা নিৰ্বাহ কৰা অসমীয়া গাঁওসমূহৰ দুখীয়া পৰিয়ালসমূহৰ নিদ্ৰা হৰিছে ছাগলী চোৰে ৷
অৱশেষত বৰপেটাত আৰক্ষীৰ হাতত জব্দ হ’ল শতাধিক চুৰি ছাগলী (Goat thief in Barpeta)৷ গুৱাহাটীৰ বজাৰত বিক্ৰীৰ বাবে লৈ গৈ থকা অৱস্থাত গাড়ীসহ জব্দ কৰে ছাগলী কঢ়িওৱা গাড়ী ৷ বৰপেটাৰ বাঘবৰৰ পৰা গুৱাহাটীলৈ গৈ আছিল ছাগলীভৰ্তি গাড়ীখন ৷ ইতিমধ্যে বৰপেটা আৰক্ষী ছাউনীত চুৰি ছাগলীৰ সন্ধানত বহু ছাগলী পালক উপস্থিত হৈছে ৷
আৰক্ষীৰ জিম্মাত বহুগৰাকীয়ে বিচাৰি উলিয়ালে চুৰি হোৱা ছাগলী ৷ ছাগলীৰ বেপাৰীয়ে জনোৱা মতে, বাঘবৰ বজাৰৰ পৰা ক্ৰয় কৰিছিল ছাগলীখিনি ৷ বাঘবৰত চুৰি ছাগলীৰ বজাৰ গঢ় লৈ উঠা বুলিও বহুতে ধাৰণা কৰিছে ৷ কাৰ নেতৃত্বত গঢ় লৈ উঠিছে এই চুৰি ছাগলীৰ বজাৰ তাৰ অনুসন্ধানৰ দাবী জনাইছে ছাগলীপালকসকলে ৷
লগতে পঢ়ক: সৰিয়হৰ ডুলিতে ভূত: তিনিজনকৈ আৰক্ষী বিষয়াৰ চৌহদতে চোৰৰ লুট-পাত
