বৰপেটা, ১ মাৰ্চ: সমগ্ৰ ৰাজ্যতে সোমবাৰৰ পৰা কৰ্মবিৰতি ঘোষণা কৰিছে গৃহৰক্ষী জোৱানসকলে । বৰপেটা জিলাতো গৃহৰক্ষী জোৱানসকলে কৰ্তব্য পালনৰ পৰা বিৰত আছে । দুদিন ধৰি অব্যাহত থাকিব গৃহৰক্ষী জোৱানৰ কৰ্মবিৰতি । সদৌ অসম প্রশিক্ষণপ্রাপ্ত গৃহৰক্ষী সন্থাৰ বৰপেটা জিলা সমিতিয়ে জানিবলৈ দিয়া মতে, সোমবাৰে পুৱা ৬ বজাৰ পৰা কর্মবিৰতি পালন কৰা হৈছে ।
গৃহৰক্ষী জোৱানসকলৰ বৰ্দ্ধিত মাহিলী দৰমহাৰ ক্ষেত্ৰত উচতম ন্যায়ালয়ে দিয়া নির্দেশ অসম চৰকাৰে পালন কৰা নাই বুলি অভিযোগ তুলিছে গৃহৰক্ষী জোৱানসকলে । লগতে চৰকাৰে তেওঁলোকৰ সমস্যাৰ প্ৰতি গুৰুত্ব দিয়া নাই বুলিও ক্ষোভ প্ৰকাশ কৰে । শীঘ্ৰে এই নিৰ্দেশসমূহ পালন কৰিবলৈ গৃহৰক্ষী জোৱানসকলে চৰকাৰক আহ্বান জনাইছে ।
উল্লেখ্য যে, বৰপেটা জিলাত ১,৩০০ গৰাকী গৃহৰক্ষী জোৱান আছে আৰু সমগ্ৰ অসমত ২৭,০০০ জোৱান আছে । জোৱানসকলে স্পষ্ট কৰি দিছে যে, চৰকাৰে তেওঁলোকৰ দাবী পূৰণ নকৰিলে তেওঁলোকে ভোট বৰ্জন কৰিব ।
