বৰপেটা, ১১ ছেপ্টেম্বৰঃ বৰপেটাত যুৱতীৰ শ্লীলতা হানিৰ অপচেষ্টাকলৈ চাঞ্চল্য ৷ শ্বপিংমলত কৰ্মৰত এগৰাকী যুৱতীক শ্লীলতা হানিৰ অপচেষ্টা হাফিজুৰ ৰহমান নামৰ এজন যুৱকৰ ৷
উল্লেখ্য যে, বুধবাৰে বৰপেটাস্থিত এটা শ্বপিংমলত এগৰাকী যুৱতীক শ্লীলতা হানিৰ চেষ্টা চলাই অভিযুক্ত যুৱক হাফিজুৰ ৰহমানে ৷ অভিযোগ অনুসৰি, ভুক্তভোগী যুৱতীগৰাকীক হাফিজুৰে দীৰ্ঘদিন ধৰি প্ৰেমৰ প্ৰস্তাৱ দি আহিছিল ৷ কিন্তু যুৱকজনৰ প্ৰেমৰ প্ৰস্তাৱ অগ্ৰাহ্য কৰাৰ বাবেই হাফিজুৰে যুৱতীগৰাকীৰ ওপৰত আতিশায্য চলাই বুলি অভিযোগ উত্থাপন কৰে যুৱতী গৰাকীয়ে ৷ ভুক্তভোগী যুৱতীগৰাকীয়ে ইতিমধ্যে বৰপেটা সদৰ থানাত যুৱকজনৰ বিৰুদ্ধে এজাহাৰ দাখিল কৰে ৷ ঘটনাটোৰ সময়ত শ্বপিঙমলটোৰ CCTV কেমেৰা বন্ধ থকাক লৈ সৃষ্টি হৈছে ৰহস্যৰ ৷ যুৱতীগৰাকীৰ ওপৰত চলোৱা আতিশয্যৰ ঘটনাটোৰ ভিডিঅ' নাই CCTV কেমেৰাত ৷ নিশা 1 বজাৰ পৰা পুৱা 9:30 বজালৈকে বন্ধ হৈ থাকে CCTV কেমেৰা ৷ আনকি মলটোত নাথাকে কোনো নৈশ চকীদাৰ ৷ যুৱতী গৰাকীয়ে সহায় বিচাৰি চিঞৰ-বাখৰ কৰাৰ পাচতো সহায়ৰ বাবে ওলাই নাহিল কোনো ব্যক্তি ৷ যাৰ বাবে মলটোৰ অন্য ব্যক্তি ঘটনাৰ লগত জড়িত হৈ থকা বুলি অভিযোগ উত্থাপন কৰে ৷
আনহাতে, এই ঘটনাটোকলৈ হিন্দু জাগৰণ মঞ্চই তীব্ৰ প্ৰতিক্ৰিয়া প্ৰকাশ কৰিছে ৷ এগৰাকী যুৱতীক দিনৰ পোহৰতে আতিশায্য চলোৱা ঘটনাৰ বিৰুদ্ধে মুখ্যমন্ত্ৰী সৰ্বানন্দ সোণোৱালক ব্যৱস্থা গ্ৰহণৰ দাবী জনাইছে ৷ অন্যথা হিন্দু জাগৰণ মঞ্চই নিজেই ব্যৱস্থা গ্ৰহণ কৰিব বুলিও মন্তব্য কৰে ৷
