গুৱাহাটী/বৰপেটা, ২৫ অক্টোবৰ : ভাৰতীয় জনতা পাৰ্টী অসম প্ৰদেশৰ প্ৰাক্তন সম্পাদক, (former secretary of BJP Sukumar Biswas dies), বৰ্তমান অসম চৰকাৰৰ ভাষিক সংখ্যালঘু উন্নয়ন পৰিষদৰ উপাধ্যক্ষ, সদৌ অসম বঙালী যৌথ মঞ্চৰ সভাপতি তথা সদৌ অসম বঙালী যুৱ ছাত্ৰ ফেডাৰেচনৰ মুখ্য উপদেষ্টা সুকুমাৰ বিশ্বাসৰ দেহাৱসান । সোমবাৰে নিশা ১২.১৫ বজাত GMCH-ত শেষ নিশ্বাস ত্যাগ কৰে বিশ্বাসে । দুৰাৰোগ্য ৰোগত আক্ৰান্ত হৈ GMCH-ত চিকিৎসাধীন হৈ আছিল বিশ্বাস ।
সুকুমাৰ বিশ্বাসৰ মৃত্যুত শোক প্ৰকাশ কৰিছে মুখ্যমন্ত্ৰী ড৹ হিমন্ত বিশ্ব শৰ্মাই (CM Himanta Biswa Sarma expressed grief) । সামাজিক মাধ্যমত মুখ্যমন্ত্ৰীয়ে লিখিছে, ‘‘অসম ভাষিক সংখ্যালঘু উন্নয়ন পৰিষদৰ মাননীয় উপাধ্যক্ষ তথা বিজেপি দলৰ এগৰাকী জ্যেষ্ঠ কাৰ্যকৰ্তা সুকুমাৰ বিশ্বাসদেৱৰ মৃত্যুৰ বাতৰিয়ে মৰ্মাহত কৰিলে । ছাত্ৰাৱস্থাৰ পৰাই সামাজিক আৰু ৰাজনৈতিক ক্ষেত্ৰখনৰ সৈতে ওতপ্ৰোতভাৱে জড়িত বিশ্বাসদেৱৰ বিদেহী আত্মাৰ চিৰশান্তি কামনা কৰি শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিলোঁ।’’
আনহাতে, প্ৰাক্তন মুখ্যমন্ত্ৰী তথা কেন্দ্ৰীয় মন্ত্ৰী সৰ্বানন্দ সোণোৱালেও (Central Minister Sarbananda Sonowal) সুকুমাৰ বিশ্বাসৰ মৃত্যুত গভীৰ শোক প্ৰকাশ কৰে । তেওঁৰ বিদেহী আত্মাৰ চিৰশান্তি কামনা কৰি শোকসন্তপ্ত পৰিয়ালবৰ্গলৈ গভীৰ সমবেদনা জনায় সোণোৱালে ।
ইপিনে অসম ভাষিক সংখ্যালঘু উন্নয়ন পৰিষদৰ (Assam Linguistic Minorities Development Board) উপাধ্যক্ষ তথা ভাৰতীয় জনতা পাৰ্টীৰ অন্যতম জ্যেষ্ঠ কাৰ্যকৰ্তা সুকুমাৰ বিশ্বাসৰ অকাল মৃত্যুত ৰাজ্যিক বিজেপিৰ সভাপতি ভৱেশ কলিতাই গভীৰ শোক প্ৰকাশ কৰিছে । কলিতাই কয়, প্ৰয়াত সুকুমাৰ বিশ্বাসে দলৰ সাংগঠনিক ভেটি সবল কৰাত গুৰুত্বপূৰ্ণ অৱদান আগবঢ়াই গৈছে । তেওঁৰ দৰে এগৰাকী নিষ্ঠাৱান কাৰ্যকৰ্তাৰ বিয়োগ দলৰ বাবে অপূৰণীয় ক্ষতি ।
ৰাজ্যিক সভাপতিগৰাকীয়ে প্ৰয়াত সুকুমাৰ বিশ্বাসৰ বিদেহী আত্মাৰ সদগতি কামনা কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জনাইছে । উল্লেখযোগ্য যে প্ৰয়াত সুকুমাৰ বিশ্বাস ৰাজ্যিক বিজেপিৰ প্ৰাক্তন সম্পাদক আছিল । মৃত্যুৰ সময়ত তেওঁৰ বয়স আছিল ৫০ বছৰ ।
ইফালে বৰপেটা জিলাৰ চেঙা বাটগাঁওস্থিত মতাবড়ীৰ বাসগৃহত সুকুমাৰ বিশ্বাসৰ মৃতদেহ আহি পোৱাৰ লগে লগে এক অবৰ্ণনীয় পৰিবেশৰ সৃষ্টি হয় । সুকুমাৰ বিশ্বাসৰ বিয়োগত শোকাকুল পৰিৱেশে বিৰাজ কৰিছে বাটগাঁও অঞ্চলত । মঙলবাৰে অসম চৰকাৰৰ হৈ মন্ত্ৰী ৰণজিৎ কুমাৰ দাস মৃতকৰ বাসগৃহত উপস্থিত হৈ শেষ শ্ৰদ্ধাঞ্জলি জ্ঞাপন কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰে ।
মন্ত্ৰী ৰণজিৎ কুমাৰ দাসৰ উপস্থিতিত প্ৰয়াত সুকুমাৰ বিশ্বাসৰ পত্নীৰ স'তে মোবাইলযোগে বাৰ্তালাপ কৰি শোকসন্তপ্ত পৰিয়ালবৰ্গলৈ সমবেদনা জ্ঞাপন কৰে মুখ্যমন্ত্ৰী ড৹ হিমন্ত বিশ্ব শৰ্মাই । প্ৰতিকূল বতৰকো নেওচি অসংখ্য গুণমুগ্ধৰ উপস্থিতিত মঙলবাৰে ৰাজহুৱা শ্মশানত সুকুমাৰ বিশ্বাসৰ শেষকৃত্য সমাপন কৰা হয় ।
সুকুমাৰ বিশ্বাসৰ শেষকৃত্য অনুষ্ঠানত বৰপেটা জিলা বিজেপি সমিতিৰ সভাপতি অনিল কুমাৰ দাস, সাধাৰণ সম্পাদক হেমন্ত দেউৰী, বিজেপি নেতা প্ৰদীপ দাস, চেঙা জিলা পৰিষদৰ সদস্য তথা বৰপেটা জিলা বিজেপিৰ উপ-সভাপতি বসন্ত ঠাকুৰীয়া, বিজনীৰ বিধায়ক অজয় ৰয়, বিটিআৰৰ ই এম গৌতম দাসৰ উপৰি কেইবাগৰাকীও বিশিষ্ট লোক উপস্থিত থাকে । সুকুমাৰ বিশ্বাসে মৃত্যুৰ সময়ত পত্নী, দুই পুত্ৰ, বৃদ্ধা মাতৃৰ লগতে আত্মীয়-স্বজনক ইহ-সংসাৰত এৰি থৈ যায় ।
লগতে পঢ়ক :Cyclone Sitrang in Assam : কলিয়াবৰত ধুমুহাৰ তাণ্ডৱ, ক্ষতিগ্ৰস্ত খেতিয়ক
