বৰপেটা, 20 আগষ্ট : জুৰিয়াস্থিত মৰাপাট নিগমৰ দুই অসমীয়া মহিলা কৰ্মচাৰীক বাংলা ভাষা কবলৈ বাধ্য কৰোৱা ঘটনাক তীব্ৰ সমালোচনা কৰিছে গৰিয়া মৰিয়া দেশী জাতীয় পৰিষদে ৷ বৰপেটাৰ চেঙাত সদৌ অসম গৰিয়া মৰিয়া দেশী জাতীয় পৰিষদে এই সম্পৰ্কত তীব্ৰ প্ৰতিক্ৰিয়া প্ৰকাশ কৰে ৷ পুনৰ এনে কাৰ্য কোনোবাই সংঘটিত কৰিলে বহি নাথাকিব বুলিও হুংকাৰ দিলে সংগঠনটোৰ বিষয়ববীয়া সকলে ৷
উল্লেখযোগ্য যে, নগাঁও জিলাৰ ৰূপহীহাটত ভাৰতীয় মৰাপাট নিগমৰ জুৰীয়াস্থিত আঞ্চলিক কাৰ্যালয়ত বাংলা ভাষা নোকোৱাৰ বাবেই দুগৰাকী মহিলা কৰ্মচাৰীক কামৰ পৰা আঁতৰোৱাৰ পৰিকল্পনা কৰাৰ অভিযোগ উত্থাপিত হৈছে দুই বঙালী বিষয়াৰ ওপৰত ৷ এই অভিযোগ আনিছে খোদ দুই ভুক্তভোগী মহিলাই ৷ কলকাতা আৰু কোচবিহাৰৰ পৰা অহা সঞ্জয় কুমাৰ বৰ্মন আৰু শিৱকুমাৰ জানা নামৰ দুই বাংলা ভাষী বিষয়াই মহিলা কৰ্মচাৰীক উপদেশ দিছিল বঙালী চিনেমা চাই বাংলা ভাষা শিকিবলৈ ৷
তাৰোপৰি মহিলা দুগৰাকীক কৰ্মক্ষেত্ৰত বিভিন্ন ধৰণে হাৰাশাস্তি কৰা বুলি উল্লেখ কৰে তেওঁলোকে ৷
দুই বাংলা ভাষী বিষয়াৰ বিৰুদ্ধে উত্থাপিত হৈছে বাংলা ভাষা ক'বলৈ হেঁচা প্ৰয়োগেৰে মানসিক নিৰ্যাতন চলোৱাৰ অভিযোগ । বাংলা নোকোৱাৰ বাবেই কোনো জাননী প্ৰেৰণ নকৰাকৈ দুই খিলঞ্জীয়া মহিলাক কামৰ পৰা আঁতৰ কৰাৰো পৰিকল্পনা ৰচা বুলি দুয়োৰে বিৰুদ্ধে সৰৱ হৈছে মহিলা দুগৰাকী । অতি কৌশলেৰে সেই দুটা পদৰ বাবে কোনো জাননী নোহোৱাকৈ শুকুৰবাৰে সাক্ষাৎকাৰ অনুষ্ঠিত কৰাৰো প্ৰস্তুতি চলোৱা বুলি জানিব পৰা গৈছে ৷
লগতে পঢ়ক : কংগ্ৰেছ নেতাৰ সন্মুখতে ৰাহুল গান্ধীক সমালোচনা ৰণজিৎ কুমাৰ দাসৰ
