বৰপেটা,16 জুন : ৰাজ্যত এতিয়া ড্ৰাগছৰ বিৰুদ্ধে তীব্ৰতৰ হৈ পৰিছে আৰক্ষীৰ অভিযান ৷ অসম আৰক্ষীয়ে (Assam Police) জিলাই জিলাই ড্ৰাগছ বিৰোধী অভিযানত নামি পৰিছে ৷ বৰপেটা জিলাৰ বাঘবৰৰ আৰক্ষী বিষয়া সঞ্জয় কুমাৰ লস্কৰ আৰু মন্দিয়া আৰক্ষী চকীৰ ভাৰপ্ৰাপ্ত বিষয়া তৰুণ চন্দ্ৰ বড়োৰ নেতৃত্বত নিশা মন্দিয়া পাথাৰৰ পৰা দিঘিৰপাম গাঁৱত যৌথ অভিযান ৷ মঙলবাৰে নিশা চলোৱা এই অভিযানত আলফাজ আলীৰ পুত্ৰ ৰকিবুল ইছলাম(২৭)নামৰ যুৱকজনক আটক কৰিবলৈ সক্ষম হয় আৰক্ষীয়ে । ধৃত ৰকিবুলক ২৩.১৭ মি:গ্ৰা: ব্ৰাউন ছুগাৰসহ এটা এনড্ৰইড মোবাইল ফোন উদ্ধাৰ কৰিবলৈ সক্ষম হয় ।
উল্লেখযোগ্য যে,ব্ৰাউন ছুগাৰ সৰবৰাহকাৰী ৰকিবুল ইছলামক চিকিৎসালয়ত কৰা স্বাস্থ্য পৰীক্ষাত ক’ভিড পজিটিভ ঘোষণা কৰাত মন্দিয়া আৰক্ষীয়ে অভিযুক্ত জনক ১০৮ সেৱাৰ জৰিয়তে কলগাছিয়াৰ ক’ভিড চেন্টাৰলৈ প্ৰেৰণ কৰে । ইতিমধ্যে ধৃত ৰকিবুল ইছলামৰ বিৰুদ্ধে মন্দিয়া আৰক্ষী চকীত 224/21 NDPS Act section 22/bৰ অধীনত এটা গোচৰ পঞ্জীয়ন কৰি তদন্ত অব্যাহত ৰাখিছে । আৰক্ষীৰ এনে ধৰণৰ আদৰণীয় পদক্ষেপক উক্ত অঞ্চলৰ সচেতন মহলে ভূয়সী প্ৰশংসা কৰিছে ।
প্ৰতিদিনে বৃহৎ পৰিমাণৰ ড্ৰাগছৰ লগতে ড্ৰাগছ সৰবৰাহকাৰী (DRUGS PEDDLER) পৰিছে আৰক্ষীৰ জালত ৷ উল্লেখযোগ্য় যে,নগাঁও জিলাত আৰক্ষী অধীক্ষক হিচাপে আনন্দ মিশ্ৰ (Anand Mishra)ই যোগদান কৰাৰ পাচতে ড্ৰাগছৰ বিৰুদ্ধে তীব্ৰতৰ কৰি তুলিছে প্ৰতিটো অভিযান ৷ প্ৰতিদিনে জিলাখনৰ বিভিন্ন প্ৰান্তত অভিযান চলাই বৃহৎ পৰিমাণৰ ড্ৰাগছৰ লগতে ড্ৰাগছ সৰবৰাহকাৰীক কৰায়ত্ব কৰিবলৈ সক্ষম হৈছে নগাঁও আৰক্ষীয়ে ৷ সম্প্ৰতি জিলাখন অব্যাহত ৰখা হৈছে ড্ৰাগছ বিৰুদ্ধে তীব্ৰতৰ অভিযান ৷
