বৰপেটা, ৩০মে': সমগ্ৰ ৰাজ্যৰ লগতে বৰপেটা জিলাখনৰো বিভিন্ন স্থানত অব্যাহত আছে আৰক্ষীৰ ড্ৰাগছ বিৰোধী অভিযান । নৱ নিযুক্ত আৰক্ষী অধীক্ষক অমিতাভ সিন্হাৰ তৎপৰতাত আৰু নিৰ্দেশনাত তীব্ৰতৰ হৈ উঠিছে ড্ৰাগছৰ বিৰুদ্ধে অভিযান । এই অভিযানৰ অংশ হিচাপে শনিবাৰে তাৰাবাৰী আৰক্ষীয়ে লাভ কৰিছে বৃহৎ সফলতা ।
তাৰাবাৰী আৰক্ষীৰ জালত পৰিছে এটা ড্ৰাগছ ব্যৱসায়ী । ধৃত ড্ৰাগছ ব্যৱসায়ীটো বৰভিঠাৰ ২৭ বছৰীয়া গণি আলী । তাৰাবাৰী আৰক্ষী থানাৰ ভাৰপ্ৰাপ্ত আৰক্ষী বিষয়া জ্যোতিষ দাসৰ নেতৃত্বত এক গোপন খবৰৰ ভিত্তিত শনিবাৰে তাৰাবাৰী আৰক্ষী থানাৰ অন্তৰ্গত বৰভিঠা গাঁৱৰ গণি আলীৰ ঘৰত চলিছিল ড্ৰাগছ বিৰোধী অভিযান ।
অভিযানত গণি আলীৰ ঘৰৰ পৰা সন্দেহযুক্ত ব্ৰাউন চুগাৰ ভৰ্তি ৯ টা প্লাষ্টিকৰ কন্টেইনাৰ, দুটা খালী প্লাষ্টিকৰ কন্টেইনাৰ, তিনিটা ম'বাইল ফোন জব্দ কৰে আৰক্ষীয়ে । ধৃত ড্ৰাগছ ব্যৱসায়ী গণি আলীৰ বিৰুদ্ধে তাৰাবাৰী আৰক্ষীয়ে নিজাববীয়াকৈ গোচৰ ৰুজু কৰি অধিক তথ্যৰ বাবে গণি আলীক সোধাপোচা অব্যাহত ৰাখিছে বুলি আৰক্ষী বিষয়া জ্যোতিষ দাসে জানিবলৈ দিয়ে ।
লগতে পঢ়ক:নাৰায়ণপুৰত খহনীয়াগ্ৰস্তৰ প্ৰশ্নবানৰ সন্মুখীন মন্ত্ৰী পীয়ুষ হাজৰিকা
