বৰপেটা, 11 মে’: সমগ্ৰ ৰাজ্যৰ লগতে বজালীতো ক’ভিড আক্ৰান্তৰ সংখ্যা বৃদ্ধি পাবলৈ ধৰিছে ৷ স্বাস্থ্য বিভাগে প্ৰকাশ কৰা অনুসৰি সম্প্ৰতি বজালীত ক’ভিড ৰোগীৰ সংখ্যা ৫৪৩ গৰাকীলৈ বৃদ্ধি পাইছে । জানিব পৰা মতে, সোমবাৰৰ দিনটোত বজালীৰ ভৱানীপুৰৰ বাংলীপাৰাত হৃদয় কলিতা(45) নামৰ এজন ব্যক্তিৰ ক’ভিডত আক্ৰান্ত হৈ মৃত্যু হয়৷ হৃদয় কলিতা দীৰ্ঘদিন ধৰি জ্বৰ ,কাহত ভূগি থকাত সোমবাৰে পুৱা সংকটজনক অৱস্থাত বৰপেটা চিভিল হাস্পতাললৈ প্ৰেৰণ কৰা হৈছিল যদিও সন্ধিয়া ভাগত মৃত্যুক আকোঁৱালি লয় ৷
আনহাতে, মঙলবাৰে পুৱা বজালী জিলাৰ হকাৰটুপৰ ঘনাকান্ত দাস নামৰ আন এজন ব্যক্তিৰ ক’ভিডত আক্ৰান্ত হৈ মৃত্যু হয় । মৃত ব্যক্তি জনৰ বয়স ৬৫ বছৰ আছিল আৰু তেওঁ শিক্ষকতা কৰিছিল বুলি জানি পৰা গৈছে । সোমবাৰে দিনৰ ভাগত তেওঁ ক’ভিড আক্ৰান্ত বুলি চিনাক্ত হয় ৷ ঘনাকান্ত দাসকে ধৰি এতিয়ালৈকে বজালীত ক’ভিডত আক্ৰান্ত হৈ মৃত্যু হোৱা লোকৰ সংখ্যা ৬ গৰাকীলৈ বৃদ্ধি পাইছে ।
লগতে পঢ়ক : ক’ভিডত স্বামীক হেৰুৱাই সমাজলৈ কাতৰ আহ্বান এগৰাকী মহিলাৰ
