বৰপেটা,৮ মে': সমগ্ৰ দেশৰ লগতে ৰাজ্যৰ চৌদিশ এতিয়া মহামাৰী কৰ'ণাৰ গ্ৰাসত । প্ৰতিদিনে সংক্ৰমণৰ হাৰ বৃদ্ধি পোৱাৰ লগতে হাজাৰ হাজাৰ লোকে অকালতে প্ৰাণ হেৰুৱাইছে । বিশ্বজুৰি মহামাৰী কৰ'ণাই সংহাৰী ৰূপ ধাৰণ কৰিছে । ৰাজ্যতো নিতৌ শ শ লোক মহামাৰী কৰ'ণাত আক্ৰান্ত হৈছে । ৰাজ্যৰ আন আন জিলাসমূহৰ সমান্তৰালকৈ বৰপেটা জিলাতো প্ৰত্যেক দিনাই আক্ৰান্ত হোৱা লোকৰ সংখ্যা বৃদ্ধি পাই আহিছে ।
শুকুৰবাৰৰ দিনটোত জিলাখনত ১৮৫ জনকৈ লোক মহামাৰীৰ কবলত পৰে ৷ শুকুৰবাৰে জিলাখনৰ ২,২৮৪ জন লোকৰ ক'ভিড পৰীক্ষা কৰা হৈছিল । পৰীক্ষাৰ অন্তত ১৮৫ জন লোকৰ শৰীৰত ধৰা পৰে ক'ভিডৰ অৱস্থিতি । ইয়াৰ লগে লগে বৰপেটাত ১,৯০১ জনলৈ বৃদ্ধি পায় ক'ভিডত আক্ৰান্ত লোকৰ সংখ্যা ।
আনহাতে, একেটা দিনতে জিলাখনত ২ জন ৰোগীয়ে কৰ'ণাত আক্ৰান্ত হৈ প্ৰাণ হেৰুৱাইছে । ফলত জিলাখনত এই পৰ্যায়লৈ নিহত হোৱা লোকৰ সংখ্যা ২৩ জনলৈ বৃদ্ধি পায় । আনহাতে, বৰ্তমান মহামাৰীত আক্ৰান্ত লোকসকলৰ ভিতৰত ৫৩৫ গৰাকীয়ে আৰোগ্য লাভ কৰে । শুকুৰবাৰৰ দিনটোত ১,৩৩৭ গৰাকী কৰ'ণা ৰোগী চিকিৎসাধীন হৈ আছে ।
লগতে পঢ়ক: কৰ'ণাৰ হটস্পটলৈ পৰিণত কৰিমগঞ্জ জিলা কাৰাগাৰ
