জনীয়া, 15 নৱেম্বৰ: বৰপেটা জিলাৰ জনীয়া ৰাজ্যিক চিকিৎসালয়ত জননী সুৰক্ষা যোজনাত ব্যাপক দুৰ্নীতি হোৱাৰ অভিযোগ উত্থাপিত হৈছে । উক্ত চিকিৎসালয়ত কৰ্মৰত চিকিংসক তথা গাণনিক গৰাকীয়ে ভুৱা চহীৰে হিতাধিকাৰীৰ ধন মোকোলাই নিয়াৰ কথা পোহৰলৈ আহিছে । উক্ত ঘটনাৰ সৈতে ডাঃ ছামাদ আলী আৰু শ্বাহজাহান আলী জড়িত থকাৰ সন্দেহ প্ৰকাশ কৰিছে ৰাইজে । ৰাজ্যৰ স্বাস্থ্যবিভাগে ‘জননী সুৰক্ষা যোজনা’ নামৰ এক আঁচনিৰ জৰিয়তে প্ৰসূতিক ১৪শ টকা প্ৰদান কৰি আহিছে । কিন্তু চিকিৎসালয় খনত সেই ধন প্ৰদান কৰাৰ বিপৰীতে আত্মসাৎ কৰাৰ এক ভয়ংকৰ তথ্য সম্প্ৰতি জানিব পৰা গৈছে ।
ঘটনাৰ বিৱৰণী মতে, মফিদা খাতুন নামৰ এগৰাকী প্ৰসূতিয়ে ২০১৫ চনৰ ২৭ আগষ্টত এগৰাকী কন্যা সন্তান জন্ম দিয়ে । অথচ প্ৰসূতি গৰাকীয়ে আজিকোপতি প্ৰাপ্য ধনখিনি পোৱা নাই । মহিলা গৰাকীয়ে চিকিৎসালয়লৈ তাঁতবাতি কৰিও ধনখিনি মোকলাব নোৱাৰিলে । শেষত ঘটনা সন্দৰ্ভত মহিলাগৰাকীৰ স্বামীয়ে চিকিৎসালয়ৰ গাণনিক শ্বাহজাহান আলীক সোধ-পোচ কৰে ৷ ইতিপূৰ্বেই ধনখিনি মোকলাই নিয়া বুলি গাণনিকজনে মহিলা গৰাকীৰ স্বামীক জানিবলৈ দিয়ে । উপায়ন্তৰহৈ মফিদাৰ স্বামীয়ে ঘটনাটো সাংবাদিকৰ আগত অৱগত কৰে ৷ সাংবাদিকে প্ৰসূতি গৰাকীৰ চহীৰ নমুনা মিলাই চোৱাৰ পিছত এই কথা ধৰা পৰে ৷ বৰ্তমানলৈকে প্ৰায় ৩০ গৰাকীৰো অধিক প্ৰসূতিৰ ধন একেগৰাকী ব্যক্তিয়ে ভুৱাচহীৰে উলিয়াই নিয়াৰ কথা পোহৰলৈ আহে । এইক্ষেত্ৰত বিশেষকৈ গাণনিক গৰাকীৰ ভূমিকাক লৈ সন্দেহৰ আঙুলি টোৱাইছে স্থানীয় ৰাইজে । উক্ত ঘটনাটো দুৰ্ভাগ্যজনক বুলি মন্তব্য প্ৰকাশ কৰিছে চিকিৎসক গৰাকীয়ে । এই দুৰ্নীতিৰ বিৰুদ্ধে বৰপেটা যুটীয়া স্বাস্থ্যসঞ্চালকে কি স্থিতি গ্ৰহণ কৰিব সম্প্ৰতি এইটো এটা ডাঙৰ প্ৰশ্ন হৈ থিয় দিছে ৷
