বৰপেটা, ১ মে’ঃ বৰপেটা জিলাৰ অধিকাংশ কৃষকে মুৰৰ ঘাম মাটিত পেলাই উৎপাদন কৰা পাচলি লক্ ডাউনৰ ফলত পথাৰতে নষ্ট হৈছে ৷ শীতল ভঁৰালৰ অভাৱত পাচলি পথাৰতে নষ্ট হোৱাৰ বাবে কৃষকসকল কি দৰে ক্ষতিগ্ৰস্ত হৈছে সেই সন্দৰ্ভত ইটিভি ভাৰতত সবিস্তাৰে বাতৰি প্ৰকাশ পাইছে ৷ তথাপিও ৰাজ্যৰ কৃষকক সকাহ দিয়াৰ কোনো তৎপৰতা এইপৰ্যন্ত বিয়াগোম কৃষি বিভাগটোৰ মাজত পৰিলক্ষিত হোৱা নাই ৷
বৰপেটাৰ হাউলীৰ ৩১ নং ৰাষ্ট্ৰীয় ঘাইপথৰ সমীপত ৰাজ্যৰ কৃষি বিভাগৰ এটা শীতল ভঁৰাল দীৰ্ঘদিনে পৰিত্যক্ত অৱস্থাত আছে ৷ জিলাখনৰ সৰভোগ, বৰপেটাৰোড, হাউলী আদি অঞ্চলৰ কৃষকসকলৰ সুবিধাৰ বাবে ১৯৮৭ চনত শাসনাধীন অগপ চৰকাৰে হাউলীত স্থাপন কৰিছিল এটা শীতল ভঁৰাল ৷ পৰৱৰ্তী সময়ত কাৰিকৰী বিজুতি আৰু কৃষি বিভাগৰ সু-পৰিচালনাৰ অভাৱত শীতল ভঁৰালটো জহি-খহি পৰিত্যক্ত অৱস্থালৈ পৰ্যবসিত হয় ৷ তদুপৰি ভঁৰালটোৰ প্ৰায় সকলো মূল্যবান যন্ত্ৰ-পাতি চুৰি কৰি নিয়ে চোৰে ৷ ভঁৰালৰ ভৱনটো বৰ্তমান মানসিকভাৱে অসুস্থ এগৰাকী মহিলাৰ আশ্ৰয়স্থলী হৈ পৰিছে ৷ ভঁৰালটোৰ লগতে কৰ্মচাৰীৰ বাবে নিৰ্মাণ কৰা আৱাসকেইটাও বৰ্তমান উৱলি গৈছে ৷
কিন্তু ইয়াৰ পিছতো কৃষি বিভাগে নিৰ্বিকাৰ ভূমিকা গ্ৰহণ কৰাত স্থানীয় লোক ক্ষোভিত হৈ পৰাৰ লগতে উক্ত স্থানত নতুনকৈ শীতল ভঁৰাল এটা স্থাপনৰ বাবে মন্ত্ৰী অতুল বৰাক দাবী জনাইছে ৷ বিশেষকৈ হাউলীৰ বৰপেটাৰোডৰ পৰা উত্তৰ-পূৰ্বাঞ্চলৰ লগতে দেশৰ বিভিন্ন ৰাজ্যৰ উপৰিও ম্যানমাৰ, পাকিস্তানলৈকে পাচলি সৰবৰাহ হয় ৷ সেয়ে উক্ত অঞ্চলত এটা শীতল ভঁৰাল স্থাপন কৰিলে জিলাখনৰ কৃষকসকলৰ যথেষ্ঠখিনি সকাহ হ’ব ৷ কিন্তু ইয়াকে নকৰি ইখন জিলাৰ পৰা সিখন জিলা পৰিভ্ৰমণতে কৃষিমন্ত্ৰী গৰাকীয়ে দায়িত্ব সামৰিব খুজিছে বুলি অনুভৱ কৰিছে স্থানীয় ৰাইজে ৷
লগতে চাওকঃ আন্তঃৰাজ্যিক যাতায়াতৰ বাবে ছজনীয়া কমিটি গঠন অসম চৰকাৰৰ
