বৰপেটা , 15 এপ্ৰিলঃ বৰপেটাত ৰঙালী বিহুৰ ঢোল পেঁপা গগনা বিহু নামৰ পৰিৱৰ্তে সম্পূৰ্ণ সত্ৰীয়া ৰীতিৰে পৰিশীলিত ৰূপত পালন কৰা হয় ব'হাগ বিহু ৷ বৰপেটাত স্থানীয় ভাষাত ব'হাগ বিহুক কোৱা হয় বৈহাগ'ৰ দোমাহী ৷
চতৰ সংক্ৰান্তিৰ পৰা সাতদিন জুৰি পালন কৰা বৈহাগৰ দোমাহী ৷ আজি পহিলা বহাগৰ দিনটোত বৰপেটা সত্ৰত পালন কৰা হৈছে বৰ দোমাহী ৷ বৰ দোমাহী উপলক্ষে সত্ৰত সেৱা জনাবলৈ সত্ৰবাসী ভক্তপ্ৰাণ লোকসকল আহি সত্ৰত ভিৰ কৰা পৰিলক্ষিত হয় ৷ লগতে সত্ৰত পুৱা নাম প্ৰসংগৰ পিচত সত্ৰৰ গায়ন বায়নে গুৰুঘাট বজায় ৷ পহিলা বহাগৰ দিনটোত সত্ৰত আঠু লৈ গুৰু জনাৰ আশীৰ্বাদ কামনা কৰে ভক্ত সকলে ৷ পুৱাৰ প্ৰসংগৰ পিচতে বৰপেটা সত্ৰত বৰ্ষফল গণনা আৰম্ভ হ'ব ৷ সত্ৰৰ দৈৱজ্ঞই কৰা বৰ্ষফল গননা শুনিবলৈ আজি সত্ৰত সমবেত হ'ব বৰপেটাবাসী ৷ সত্ৰৰ কীৰ্তনঘৰৰ ভিতৰত প্ৰথমতে বৰ্ষফল গণনাৰ পিচতেই সত্ৰৰ মঠৰ চোতাল আৰু আইসকলে প্ৰসংগ কৰা কাঠিত পাঠ কৰা হ'ব বৰ্ষফল গণনা ৷
