বৰপেটা, 11 ছেপ্তেম্বৰ: বৰপেটাৰ ৰাজ্য কপোৱা ৫ শ কোটি টকাৰ বীমা কেলেংকাৰীৰ বিচাৰ প্ৰক্ৰিয়া চলি থকাৰ মাজতেই জিলাখনত পুনৰ সংঘটিত হৈছে এক বীমা কেলেংকাৰী কাণ্ড ৷ বৰপেটাৰ পালহাজীৰ মোজাম্মিল হক নামৰ এজন যুৱকৰ মৃত্যুৰ ভুৱা প্ৰমানপত্ৰ প্ৰদান কৰি আৰক্ষীৰ জালত পৰিল চেঙা প্ৰাথমিক স্বাস্থ্য কেন্দ্ৰৰ স্বাস্থ্য বিষয়া ডাঃ নুৰুল ইছলাম ৷ সোমবাৰে বৰপেটাৰ অতিৰিক্ত আৰক্ষী অধীক্ষক পংকজ কাকতিৰ নেতৃত্বত বৰপেটা আৰক্ষীৰ এটা দলে গ্ৰেপ্তাৰ কৰে চিকিৎসকজনক ৷ চিকিৎসকজনে প্ৰদান ভুৱা মৃত্যুৰ প্ৰমাণ পত্ৰৰে মোজাম্মিল হকৰ পৰিয়ালে ১৬ লাখ টকাৰ বীমাৰ ধন উলিওৱাৰ পাছত পোহৰলৈ আহিল এই বৃহৎ জালিয়াতিৰ ঘটনা ৷ ঘটনা সন্দৰ্ভত আৰক্ষীয়ে ইতিমধ্যে অভিযুক্ত চিকিৎসক নুৰুল ইছলামৰ বিৰূদ্ধে ভাৰতীয় দণ্ডবিধি আইনৰ ১২০ বি/৪২০/১০৬/৪০৯/৪৬৮/৪৭১ ধাৰা অধীনত ১৬১৯/১৯ নম্বৰত গোচৰ ৰুজু কৰি তদন্ত প্ৰক্ৰিয়া আৰম্ভ কৰিছে ৷ মঙলবাৰে বৰপেটা মুখ্য ন্যায়িক দণ্ডাধীশৰ আদালতে চিকিৎসকজনক দুদিনৰ বাবে আৰক্ষী জিম্মালৈ প্ৰেৰণ কৰে ৷
উল্লেখযোগ্য যে কিছুদিন আগতে ৰাজ্যখনত সংঘটিত হোৱা পাঁচ শ কোটি টকাৰ বীমা কেলেংকাৰীৰ সৈতে জড়িত বৰপেটা মেডিকেল কলেজৰ এজন চিকিৎসককে ধৰি মুঠ দুজনকৈ চিকিৎসকক গ্ৰেপ্তাৰ কৰিছিল বৰপেটা আৰক্ষীয়ে ৷ তাৰোপৰি আৰক্ষীৰ হাতত গ্ৰেপ্তাৰ হোৱা ব্যক্তিৰ তালিকাত বীমা কোম্পানীৰ শীৰ্ষ পদাধিকাৰীৰ পৰা আৰম্ভ কৰি বীমা বিষয়া, চিকিৎসাকৰ্মী, গাওবুঢ়া, বীমা কোম্পানীৰ এজেন্ট, ইনভেষ্টিগেটৰও আছে ৷ তাৰ পাছতো আকৌ নতুনকৈ বীমা কেলেংকাৰী আৰম্ভ হোৱাত সমগ্ৰ জিলাতে তীব্ৰ চাঞ্চল্যৰ সৃষ্টি হৈছে ৷
