বৰপেটা, ২১ মাৰ্চঃ কৰ'ণা ভাইৰাছ সংক্ৰমন প্ৰতিৰোধৰ তাৎক্ষনিক ব্যৱস্থা হিচাপে বৰপেটা জিলা প্ৰশাসনে ইতিমধ্যে বৰপেটা জিলাত ১৪৪ ধাৰা জাৰি কৰিছে ৷ আনকি জিলাখনৰ শ্বপিং মলসমুহৰ লগতে জিলাখনৰ সকলোবোৰ অৰ্ধ সাপ্তাহিক, সাপ্তাহিক, পষেকীয়া হাট, বজাৰ, গৰু বজাৰ আদি বন্ধৰ নিৰ্দেশ দিছে বৰপেটাৰ উপায়ুক্তই ৷ কৰ'না ভাইৰাছ সংক্ৰমণ প্ৰতিৰোধ কৰাৰ বাবে বৰপেটা জিলা প্ৰশাসনে জাৰি কৰা সকলো নিষেধাজ্ঞা আওকান কৰি শনিবাৰে খোলা আছে হাউলী চহৰৰ সাপ্তাহিক বজাৰ ৷
বজাৰ খোলা বাবেই হাউলীৰ সাপ্তাহিক বজাৰত ব্যাপক জনসমাগম দেখিবলৈ পোৱা যায়৷ শনিবাৰৰ পুৱা ভাগৰ পৰা বৃহত্তৰ হাউলীৰ লগতে, ভৱানীপুৰ, বৰপেটা, বৰপেটাৰোড, কলগাছিয়া, দনীয়া, বাঘবৰ আদি জিলাখনৰ বিভিন্ন প্ৰান্তৰ ব্যৱসায়ী আৰু গ্ৰাহক আহি বজাৰত ভীৰ কৰা পৰিলক্ষিত হয় ৷ জিলা প্ৰশাসনৰ এনে নিষেধাজ্ঞা অমান্য কৰাৰ কথাত উদ্বিগ্ন হৈ পৰিছে ৰাইজ ৷
আনহাতে, প্ৰশাসনে নিষেধাজ্ঞা আৰোপতে সীমাৱদ্ধ নাথাকি নিৰ্দেশ সমূহ কাৰ্যকৰীকৰণত মনোনিবেশ নকৰিলে কৰ'না ভাইৰাছ সংক্ৰমণ ৰোধত সফল হ'ব পৰা নাযাব বুলি ৰাইজে মন্তব্য কৰে৷ যাৰ পৰিপ্ৰেক্ষিতত হয়তো পৰৱৰ্তী সময়ত জিলাখনত এক ডাঙৰ প্ৰত্যাহ্বান সৃষ্টি হ'ব ৷
