বৰপেটা, 25 চেপ্তেম্বৰঃ জনীয়াত কংগ্ৰেছৰ পৰা দলীয় প্ৰাৰ্থীত্ব বিচাৰি ২০ জনে জনাইছিল আবেদন ৷ মঙলবাৰে বৰপেটাৰ ৰাজীৱ ভৱনত অনুষ্ঠিত হৈ যায় বৰপেটা জিলা কংগ্ৰেছৰ কাৰ্যনিৰ্বাহক সভা ৷ সভাত প্ৰাৰ্থীত্ব বিচাৰি আবেদন জনোৱা সকলোকেইগৰাকী আবেদনকাৰীৰ নাম প্ৰদেশ কংগ্ৰেছ কমিটীলৈ প্ৰেৰণ কৰাৰ সিদ্ধান্ত গ্ৰহন কৰে জিলা কংগ্ৰেছে ৷ ইয়াৰ মাজতেই বুধবাৰে গুৱাহাটীত প্ৰদেশ কংগ্ৰেছৰ নেতৃত্বৰ সৈতে বৰপেটা জিলা কংগ্ৰেছৰ এক গোপন বৈঠক অনুষ্ঠিত হয় ৷ য'ত অংশ লয় জনীয়াৰ প্ৰাক্তন বিধায়ক তথা সাংসদ আব্দুল খালেকে ৷ এই বৈঠকতে একপ্ৰকাৰ চূড়ান্ত কৰা হয় জনীয়াৰ প্ৰাৰ্থীত্ব ৷ 27 চেপ্তেম্বৰত অনুষ্ঠানিক ভাবে ঘোষণা কৰা হ'ব প্ৰাৰ্থীৰ নাম ৷ জনীয়াত কংগ্ৰেছৰ প্ৰাৰ্থীত্ব বিচাৰি আবেদন জনাইছে তিনিজনকৈ প্ৰাক্তন বিধায়কে ৷ জনীয়া সমষ্টিৰ পৰা কংগ্ৰেছৰ প্ৰাৰ্থীত্ব বিচৰা নেতাসকৰলৰ ভিতৰত আছে বৰপেটাৰ প্ৰাক্তন বিধায়ক আব্দুৰ ৰহিম খান আৰু জনীয়াৰ দুই প্ৰাক্তন বিধায়ক আব্দুছ ছোভান আৰু আব্দুৰ ৰৌফ ৷ পিছে জনীয়াত কোনে পাব কংগ্ৰেছৰ প্ৰাৰ্থীত্ব ইয়াকে লৈ দলটোৰ মাজত চলিছে তীব্ৰ উৎকন্ঠা ৷
আনহাতে, বৰপেটা জিলা কংগ্ৰেছৰ সভাপতি শান্তনু শৰ্মাৰ অকপট স্বীকাৰোক্তি, "বৰপেটাৰ প্ৰাক্তন বিধায়ক আব্দুৰ ৰহিম খানেও পাব পাৰে জনীয়াৰ প্ৰাৰ্থীত্ব ৷"
