বৰপেটা, 15 মাৰ্চ: বিশ্বজুৰি ত্ৰাসৰ সৃষ্টি কৰা কৰ’ণা ভাইৰাছৰ সংক্ৰমণৰ সম্ভাৱনা প্ৰতিৰোধ কৰাৰ বাবে বৰপেটা জিলা প্ৰশাসনৰ ব্যাপক তৎপৰতা ৷ এই ভাইৰাছৰ সৈতে মোকাবিলা কৰাৰ উদ্দেশ্যে জিলাখনৰ সকলো বজাৰ অঞ্চলত চাফাই অভিযান আৰম্ভ কৰিছে বৰপেটা জিলা প্ৰশাসনে । বৰপেটা বৰ বজাৰৰ সকলো মাছ, মাংসৰ দোকান সমূহতো চাফাই অভিযান চলাইছে জিলা প্ৰশাসনে ৷
বৰপেটাৰ লগতে বৰপেটা ৰোড চহৰ, সৰ্থেবাৰী আদি চহৰতো এই পৰিষ্কাৰ অভিযান চলোৱা হৈছে ৷ ইপিনে বৰপেটা জিলা স্বাস্থ্য বিভাগে ৰেপিড ৰেছপোনছ টীম গঠন কৰি কৰ’ণা সম্পৰ্কীয় যিকোনো প্ৰত্যাহ্বানৰ মুখামুখি হ’বলৈ সাজু হৈ পৰিছে ।
ইতিমধ্যে বৰপেটা মেডিকেল কলেজ হাস্পতাল আৰু কলগাছিয়াৰ বৰপেটা অসামৰিক চিকিৎসালয়ত দুটা সুকীয়া ৱাৰ্ড আৰু অন্যান্য চিকিৎসালয় সমূহ লৈ মুঠ 100 খন বিছনা সাজু কৰি তোলা হৈছে । বৰপেটা চিকিৎসা মহাবিদ্যালয় হাস্পতাল আৰু কলগাছিয়াৰ বৰপেটা জিলা অসামৰিক চিকিৎসালয়ত দুখন এম্বুলেন্স সাজু কৰি ৰখা হৈছে যাতে এনে ৰোগৰ সম্ভাৱনাৰ খবৰ পোৱা মাত্ৰকে ৰোগীক চিকিৎসালয়ত ভৰ্তি কৰিব পাৰে ৷
আনহাতে জিলা উপায়ুক্তৰ নিৰ্দেশ ক্ৰমে জিলাখনৰ হোটেল অতিথিশালা আদিত বিদেশী পৰ্যটকৰ আগমণৰ ওপৰত চোকা দৃষ্টি ৰখা হৈছে বুলিও জিলা প্ৰশাসনে জানিবলৈ দিছে ৷ সকলোকে চাফ-চিকুনতা অৱলম্বনৰ উপৰি পৰাপক্ষত জনসমাগম এৰাই চলাৰ বাবে পৰামৰ্শ আগবঢ়াইছে প্ৰশাসনে ৷
