জনীয়া, 21 নৱেম্বৰ : শিক্ষক আৰু শিক্ষাৰ্থী অবিহনেই চলিছে এখন বিদ্যালয় ৷ বিদ্যালয়খনত শিক্ষক আৰু ছাত্ৰ-ছাত্ৰীৰ অনুপস্থিতিয়ে এতিয়া এক চৰ্চাৰ বিষয় হৈ পৰিছে শিক্ষিত সমাজত ৷ এই দৃশ্য পৰিলক্ষিত হৈছে বৰপেটা জিলাৰ ৰূপসী প্ৰাথমিক শিক্ষা খণ্ডৰ অন্তৰ্গত বলাইপাথাৰ আঞ্চলিক ছোৱালী এম ই মাদ্ৰাছা(Balaipathar Anchalik Girls ME Madrassa)ত ৷
ছাত্ৰ-ছাত্ৰী আৰু শিক্ষকৰ অনুপস্থিতিতেই চলি আছে মাদ্ৰাছা(Madrassa)খন ৷ জানিব পৰা মতে, মাদ্ৰাছাখনত প্ৰধান শিক্ষক দেলোৱাৰ হুছাইনৰ উপৰিও আন তিনিগৰাকী শিক্ষক আছে যদিও ছাত্ৰ-ছাত্ৰীৰ সংখ্যা হ’ল শূণ্য । ক’ভিড সংক্ৰমণৰ হাৰ হ্ৰাস পোৱাৰ প্ৰতি লক্ষ্য ৰাখি ইতিমধ্যে ৰাজ্য চৰকাৰে বিদ্যালয়-মহাবিদ্যালয়সমূহ খোলাৰ অনুমতি প্ৰদান কৰিছে ৷
সেইমৰ্মে ৰূপসী প্ৰাথমিক শিক্ষা খণ্ডৰ অন্তৰ্গত এই মাদ্ৰাছাখনো খুলিছে যদিও মাদ্ৰাছাখনত উপস্থিত নাথাকে কোনো শিক্ষক আৰু ছাত্ৰ-ছাত্ৰী । মাদ্ৰাছাখনৰ এনে নাভূত-নাশ্ৰুত কাণ্ডক লৈ চিন্তিত হৈ পৰিছে স্থানীয় সচেতন ৰাইজ । আনকি মাদ্ৰাছাখনত সপ্তাহত এদিন উপস্থিত থাকি হাজিৰা বহীত চহী কৰি দায়িত্ব সামৰে প্ৰধান শিক্ষক দেলোৱাৰ হুছাইনে । এই অভিযোগ উত্থাপন কৰিছে ৰাইজে ৷
ইয়াৰোপৰি, বিভাগীয় তদন্তৰ সময়ত একাংশ ভাড়াতীয়া ছাত্ৰ-ছাত্ৰীৰে প্ৰধান শিক্ষকগৰাকীয়ে মাদ্ৰাছা চলায় বুলি একাংশ ৰাইজে অভিযোগ তুলিছে । শীঘ্ৰেই প্ৰধান শিক্ষকজনৰ ওপৰত দৃষ্টি ৰাখিবলৈ বিভাগীয় কৰ্তৃপক্ষক আহ্বান জনাইছে সচেতন ৰাইজে ৷
লগতে পঢ়ক : কিয় মুখ্যমন্ত্ৰীয়ে ঘোষণা কৰিলে চাৰি শতাধিক বিদ্যালয় সম্পূৰ্ণকৈ বন্ধ কৰাৰ কথা ?
