কলগাছিয়া, 22 জুন : ৰাজ্যত অব্যাহত আছে বানৰ সংহাৰ (Assam Flood 2022) ৷ কলগাছিয়াৰ বাংকাভাঙাত এক হৃদয় বিদাৰক ঘটনা সংঘটিত হৈছে ৷ কৃত্ৰিম বানত ডুবি অকাল মৃত্যুক সাৱটি লয় এটি ডেৰ বছৰীয়া শিশুৱে (Baby died at Jania) ৷
ঘটনা অনুসৰি উল্লেখযোগ্য যে বুধবাৰে কলগাছিয়া ৰাজহ চক্ৰৰ অন্তৰ্গত বাংকাভাঙা গাঁৱৰ আব্দুল মালেকৰ ডেৰ বছৰীয়া পুত্ৰ শ্বাকিবুল হাছানে খেলি থকা অৱস্থাত ঘৰৰ ওচৰতে কৃত্ৰিম বানত ডুব যায় ৷ লগে লগে ওচৰ চুবুৰীয়াই শিশুটোক পানীৰ পৰা উদ্ধাৰ কৰি কলগাছিয়াৰ বৰপেটা অসামৰিক চিকিৎসালয়লৈ লৈ যায় যদিও চিকিৎসকে শিশুটিক মৃত্যু বুলি ঘোষণা কৰে ৷
উল্লেখযোগ্য যে, যোৱা পোন্ধৰ দিন ধৰি নেৰানেপেৰা বৰষুণৰ ফলত অঞ্চলটোত কৃত্ৰিম বানৰ সৃষ্টি হয় (Artificial flood at Jania)৷ ইফালে মন কৰিবলগীয়া যে, ৰামপুৰৰ পৰা জনতালৈ যোৱা পথটোত কালভাৰ্ট বন্ধ কৰি থোৱাৰ ফলত পানী ওলাই যাব পৰা নাই বুলি স্থানীয় লোকে অভিযোগ উত্থাপন কৰে ৷
এই কৰুণ ঘটনাৰ পিছতেই ক্ষোভিত লোকে কালভাৰ্টটো খুলি দি পানী ওলাই যাবলৈ ব্যৱস্থা কৰি দিবলৈ আহ্বান জনায় ৷ সম্প্ৰতি শিশুটিক মৰণোত্তৰ পৰীক্ষাৰ বাবে বৰপেটাৰ ফখৰুদ্দিন আলী আহমেদ মেডিকেল কলেজ হাস্পতাললৈ প্ৰেৰণ কৰা হৈছে ৷
লগতে পঢ়ক : পানীখাইতিত ব্ৰহ্মপুত্ৰত সন্ধানহীন যুৱক
