বৰপেটা,৪ জানুৱাৰীঃ বৰপেটা পৌৰসভাৰ চতুৰ্দশ বিত্তীয় আয়োগৰ ধন ব্যয়ক লৈ ব্যাপক অনিয়মৰ অভিযোগ উত্থাপন পৌৰ সভানেত্ৰীৰ বিৰুদ্ধে ৷ বৰপেটা পৌৰ সভাই চতুৰ্দশ বিত্তীয় আয়োগৰ পৰা লাভ কৰা প্ৰায় ৬৫ লাখ টকা ব্যয়ৰ ক্ষেত্ৰত পৌৰসভাৰ সভানেত্ৰী তুলিকা দাসে লৈছে অনিয়মৰ আশ্ৰয় ৷ পৌৰসভাখনত নিবিদা আহ্বানৰ ক্ষেত্ৰত অনিয়ম সংঘটিত হোৱা বুলি জিলা উপায়ুক্তক অভিযোগ দাখিল কৰিছে বৰপেটা আঞ্চলিক ছাত্ৰ সন্থাই ৷ ছাত্ৰ সন্থাৰ পৰা অভিযোগ লাভ কৰাৰ পিচতে শনিবাৰে বৰপেটাৰ জিলা উপায়ুক্তই নিবিদাৰ সমস্ত কাম কাজ স্থগিত ৰখাৰ নিৰ্দেশনা জাৰি কৰিছে পৌৰ সভানেত্ৰীক ৷ ছাত্ৰ সন্থাৰ অভিযোগ বৰপেটা পৌৰসভাৰ সভানেত্ৰীৰ গৰাকীয়ে আত্মীয়ক ঠিকাৰ কাম দিবলৈকে নিবিদা আহ্বানৰ ক্ষেত্ৰত আশ্ৰয় লৈছে অনিয়মৰ ৷ ছাত্ৰসন্থাৰ অভিযোগৰ ভিত্তিতে শনিবাৰে জিলা উপায়ুক্তই লৈছে এই হস্তক্ষেপ ৷ বিশেষকৈ নিবিদা বিচাৰি এসপ্তাহ পূৰ্বে জাননী জাৰি কৰিব লাগে যদিও এইক্ষেত্ৰত চতুৰালিৰ আশ্ৰয় লৈছে পৌৰসভা নেত্ৰীগৰাকীয়ে ৷
পৌৰসভাৰ সভানেত্ৰীৰ বিৰুদ্ধে ছাত্ৰ সন্থাই তোলা অভিযোগক নস্যাৎ কৰিছে পৌৰসভা নেত্ৰীগৰাকীয়ে ৷ ছাত্ৰ সন্থাৰ সদস্যক নিবিদা অবিহনে ঠিকাৰ কাম নিদিয়াৰ বাবেই তেওঁৰ বিৰুদ্ধে মিছা অভিযোগ অনাৰ দাবী কৰিছে বৰপেটা পৌৰসভাৰ সভানেত্ৰীগৰাকীয়ে ৷
লগতে পঢ়কঃ শিৱসাগৰ ঐতিহাসিক বৰপুখুৰীৰ পাৰত মানৱ শৃংখল
