জনীয়া, 13 অক্টোবৰ: অহা 21 অক্টোবৰত ৰাজ্যৰ চাৰিটা বিধানসভা সমষ্টিত হ'ব লগা উপ-নিৰ্বাচনক লৈ এতিয়া আকৰ্ষণীয় হৈ পৰিছে বৰপেটা জিলাৰ জনীয়া সমষ্টিৰ নিৰ্বাচনী প্ৰচাৰ ৷ দেওবাৰে জনীয়া সমষ্টিৰ এ আই ইউ ডি এফ দলৰ প্ৰাৰ্থী ড৹ হাফিজ ৰফিকুল ইছলামৰ হৈ কলগাছিয়াত ব্যাপক নিৰ্বাচনী প্ৰচাৰ চলাই দলটোৱে ৷ মুঠৰ ওপৰত আগন্তুক উপ-নিৰ্বাচনৰ বাবে জনীয়াত দেওবাৰে শক্তি প্ৰদৰ্শনৰে কলগাছিয়া মৰাপাট বজাৰত এক বিশাৰ জনসভাৰ আয়োজন কৰে এ আই ইউ ডি এফ দলে ৷ খন্দকাৰ জাকিৰ হুছেইনৰ সভাপতিত্বত অনুষ্ঠিত হোৱা এই বিশাল সভাত উপস্থিত হৈ কংগ্ৰেছ দলক ক্ষুৰধাৰ সমালোচনা কৰে এ আই ইউ ডি এফ দলৰ ধিং সমষ্টিৰ বিধায়ক আমিনুল ইছলামে ৷
সভাত নিজৰ ভাষণত ইছলামে কয় যে, ডিটেনশ্বন কেম্পত বন্দী হৈ থকা বৈধ ভাৰতীয় সকলক চুক্তি সাপেক্ষে মুকলাই দিয়াৰ কথা আছিল যদিও কংগ্ৰেছ সভাপতি ৰিপুণ বৰাৰ বিৰোধীতাৰ বাবেই সেয়া সম্ভৱ হৈ উঠা নাই, কিয়নো ৰিপুন বৰাই কোনো পাপ নকৰাকৈ ডিটেনশ্বন কেম্পত নৰকৰ যন্ত্ৰণা ভোগা লোকৰ দুৰ্দশা নুবুজে ৷ ইফালে সভাত প্ৰাক্তন মুখ্যমন্ত্ৰী তৰুণ গগৈকো তীব্ৰ সমালোচনা কৰে আমিনুল ইছলামে ৷ এন আৰ চিত সংখ্যালঘু মানুহৰ নাম অহাৰ কাৰণেই তৰুণ গগৈয়ে এন আৰ চিক পেলনীয়া কাগজৰ সৈতে তুলনা কৰাৰ অভিযোগ কৰে ধিং সমষ্টিৰ এ আই ইউ ডি এফ দলৰ বিধায়কগৰাকীয়ে ৷ তাৰোপৰি কংগ্ৰেছ ক্ষমতালৈ আহিলে এন আৰ চি বাতিল কৰিব বুলিও ৰাইজক অৱগত কৰে আমিনুল ইছলামে ৷ ইছলামৰ এই আৱেগিক ভাষণত বিশাল জনসভাত উপস্থিত একাংশ ৰাইজক চকুলোও টুকা দেখিবলৈ পোৱা যায় ৷
ইফালে নিজৰ ভাষণত জনীয়া সমষ্টিৰ এ আই ইউ ডি এফ দলৰ প্ৰাৰ্থী ড৹ হাফিজ ৰফিকুল ইছলামে কয় যে তেও টুপি পিন্ধা-ডাঢ়ি ৰখাক লৈ কংগ্ৰেছৰ এগৰাকী বিশেষ ব্যক্তিয়ে তেওঁক উপলুঙা কৰিছে কিন্তু তথাপিও তেওঁ দাড়ি থকা টুপি পিন্ধা মানুহৰ ন্যায়ৰ পক্ষত সদায় যুজঁ দি যাব ৷ সভাত সুন্দৰদিয়া জিলা পৰিষদৰ কংগ্ৰেছ দলৰ সদস্য মাফিজুলৰ লগতে কেইবাগৰাকী কংগ্ৰেছ নেতা কৰ্মীয়ে অনুষ্ঠানিক ভাৱে কংগ্ৰেছ ত্যাগ কৰি এ আই ইউ ডি এফ দলত যোগদান কৰে ৷
