জনীয়া, 13 জুন : বৰপেটা জিলাৰ কলগাছিয়াত কৌশলেৰে এটিএম কাৰ্ড সালসলনি কৰাৰ এক ঘটনা পোহৰলৈ আহিছে । খাটি খোৱা মহিলাৰ একাউন্টৰ পৰা ৬১ হাজাৰ টকা হৰলুকি কৰিলে দুষ্কৃতিকাৰীয়ে ।
কলগাছিয়াত বিগত বৰ্ষৰ ২১ অক্টোবৰ তাৰিখে ছকিনা খাতুন নামৰ এগৰাকী মহিলাই এটিএমত ধন উলিয়াবলৈ আহি নিজে ধন উলিয়াব নোৱাৰি এজন অচিনাক্ত যুৱকৰ সহায় লৈ পাঁচ হাজাৰ টকা উঠাই লৈ যায় ৷ কিন্তু উক্ত যুৱকজনে কৌশলেৰে মহিলাগৰাকীৰ এটিএম কাৰ্ড সালসলনি কৰি মহিলাগৰাকীৰ একাউন্টৰ পৰা 61 হাজাৰ টকা লুটি লৈ যায় ৷
পৰৱৰ্তী সময়ত উক্ত যুৱকজন ৰহিম বাদশ্বাহ বুলি চিনাক্ত কৰা হয় ৷ ঘটনা সন্দৰ্ভত কলগাছিয়া আৰক্ষী থানাত ছকিনা খাতুনে এজাহাৰ দাখিল কৰিছিল যদিও আৰক্ষীয়ে অভিযুক্তক আটক নকৰাৰ অভিযোগ উত্থাপিত হৈছে ৷
কিন্তু আঠ মাহৰ অন্তত ৰাইজে অভিযুক্ত ৰহিম বাদশ্বাহক আটক কৰি আৰক্ষীক গতাই দিবলৈ বিচাৰে যদিও আৰক্ষীয়ে অভিযু্ক্তক গ্ৰেপ্তাৰ কৰিবলৈ অমান্তি হোৱাৰ অভিযোগ উত্থাপন হৈছে ৷ অৱশেষত উক্ত ঘটনা সন্দৰ্ভত সহায় বিচাৰি ভুক্তভোগীয়ে সংবাদ মাধ্যমৰ কাষ চপাত আৰক্ষীয়ে যুৱকজনক আটক কৰিবলৈ বাধ্য হয় ৷
