জনিয়া, 2 আগষ্ট: বেঁকী নৈৰ গৰাখহনীয়াত চপৰা-চপৰে খহিছে কলগাছিয়াৰ কৰাৰকুৰ ২ নং বিকল্প ৰাজ্যিক ঘাইপথচোৱা । যি কোনো মূহুৰ্ততে ২ নং বিকল্প ৰাজ্যিক ঘাইপথচোৱা বেঁকী নৈৰ বুকুত জাহ যোৱাৰ সম্ভাৱনা প্ৰকট হৈ উঠিছে । এনে এক বিপদসংকুল পৰিস্থিতিত আপোন ঘৰ, খেতি মাটি হেৰুওৱাৰ শংকাত বিনিদ্ৰ ৰজনী কটাবলগীয়া হৈছে নৈপৰীয়া ৰাইজে (Erosion caused by Beki river) ৷
আনহাতে, বিভাগীয় কৰ্তৃপক্ষই খহনীয়া প্ৰতিৰোধৰ বাবে দিনে-নিশাই কাম কৰি আছে যদিও সময়মতে আৰু সঠিকভাৱে গৰাখহনীয়া প্ৰতিৰোধৰ কাম নকৰাৰ বাবেই আজি এই গুৰুত্বপূৰ্ণ পথটো গৰাখহনীয়াৰ কৱলত পৰি নিশ্চিহ্ন হোৱাৰ পথত বুলি অভিযোগ কৰিছে ৰাইজে । ইফালে, সোমবাৰে দিনৰ পৰাই আৰম্ভ হোৱা বেঁকী নৈৰ বাঢ়নী পানীৰ কোবাল সোঁতে সম্পূৰ্ণ ভাৱে খহাই নিলে ২ নং বিকল্প ৰাজ্যিক ঘাইপথৰ পুৰণি পথটো (Erosion of Beki river at Kalgachia) ।
ইয়াৰ পাচতো স্থানীয় বিধায়ক তথা জনপ্ৰতিনিধিয়ে কোনো ধৰণৰ গুৰুত্ব প্ৰদান নকৰাৰ ফলত অঞ্চলটোৰ লোকসকলে অসহায় অনুভৱ কৰা পৰিলক্ষিত হৈছে ৷ ভয় তথা শংকাত দিন পাৰ কৰা ৰাইজে সেয়েহে শীঘ্ৰে খহনীয়া প্ৰতিৰোধ কৰি তেওঁলোকৰ জীৱন সুৰক্ষিত কৰাৰ বাবে ব্যৱস্থা গ্ৰহণ কৰিবলৈ বৰপেটা জিলা প্ৰশাসনক আহ্বান জনাইছে ৷
উল্লেখযোগ্য যে, বেকী নদীৰ সুঁতিত একাংশ লোকে অবৈধভাৱে মাটি খনন কৰাৰ বাবেই খহনীয়াৰ তাণ্ডৱ বৃদ্ধি পোৱা বুলি অভিযোগ কৰিছে নৈপৰীয়া ৰাইজে ৷
লগতে পঢ়ক: Massive Fire in Jabalpur Hospital : জব্বলপুৰৰ হাস্পতালত বিধ্বংসী অগ্নিকাণ্ডত নিহত ১০ জন
