বাক্সা,১৩ মাৰ্চ: এইবাৰ চোৰৰ টাৰ্গেট বাথৌ মন্দিৰ । বাক্সাৰ বৰবৰীস্থিত বাথৌ মন্দিৰত শুকুৰবাৰে নিশা চোৰে চলালে চাফাই অভিযান । গভাইত চোৰে লুটি নিলে দান হিচাপে ভক্তই আগবঢ়োৱা লক্ষাধিক টকাৰ মূল্যৱান সামগ্ৰীৰ লগতে দানপাত্ৰৰ ধন । নিশা চোৰে তলা ভাঙি মন্দিৰত প্ৰৱেশ কৰে আৰু লুটপাত চলায় ।
ভক্তই আগবঢ়োৱা সোণ-ৰূপৰ চোইন, সোণৰ বেলপাত আৰু নগদ ধন মন্দিৰৰ আলমিৰাত সযতনে ৰখা হৈছিল । চোৰে এই সকলোবোৰ লুটি নিয়ে । লগতে মন্দিৰৰ বাহিৰত থকা দানপাত্ৰৰ পৰা দান-বৰঙণিৰ ধন লৈ যায় আৰু দানপাত্ৰটো দূৰৈত নি পেলাই দিয়ে । বৰবৰী বাথৌ মন্দিৰ কমিটিয়ে জানিবলৈ দিয়া মতে, ১৯৮৫ চনতে এই মন্দিৰ প্ৰতিষ্ঠা কৰা হৈছিল ৷ তেতিয়াৰে পৰা ৰাইজে দান-বৰঙণি আগবঢ়াই আহিছে ।
প্ৰতিষ্ঠাৰ পিছত প্ৰথমবাৰৰ বাবে শুকুৰবাৰে নিশা বাথৌ মন্দিৰত চুৰিকাণ্ড সংঘটিত হয় । সম্প্ৰতি বৰবৰী আৰক্ষী থানাত মন্দিৰ কমিটিয়ে এখন এজাহাৰ দাখিল কৰিছে ৷ ঘটনা সন্দৰ্ভত তদন্ত আৰম্ভ কৰিছে আৰক্ষীয়ে । আনহাতে, বৰবৰী আৰক্ষী থানাৰ কাষতে বাথৌ মন্দিৰত চোৰে লুটপাত চলোৱাত অঞ্চলবাসীয়ে এতিয়া নিৰাপত্তাক লৈ চিন্তিত হৈ পৰিছে ।
লগতে পঢ়ক: দিছপুৰ সমষ্টিৰ ভোটাৰৰ মনৰ কথাৰে আজিৰ জনতাৰ কন্ঠ
